May 7, Nilaini zan khan Europa Conference League semi-final pakhat zawk khelh a ni a, Italian club Fiorentina chuan Club Bruges an paltlang a, a zawnin Europa Conference League final an lut.
Italian club Fiorentina hian an muala khelh semi-final thawhkhatnaah 3-2 in hnehna an lo chang tawh a, final hnaih zawk an ni. Belgium club lian Club Bruges hian an mual Jan Breydelstadion-ah hnehna changin an khingpuite lehthal tum viau mah se an hlawhtling zo lova, 1-1 in an inhnehtawk.
An khingpuite lehthal tur chak mamawh Club Bruges hian an mualah bul an tan tha a, Hans Vanaken chuan minute 20-naah hmahruaina goal a thun. Hma takah goal an thun vangin an phur zui viau a, khel chhe lo viau mah se goal dang erawh an thun belh thei lo. Hun rei tak goal a luh belh theih loh hnuin hun tawp dawn hnaihah Fiorentina an vannei a, penalty a hmu. He penalty hi Lucas Beltrán chuan minute 85-naah a pet goal a, an si phurh a sut.
Goal khat ve ve an thun hnuin inkhel a hmuhnawm a, goal thun tumin an innawr tawn nasa hle. Tlawm pumpelh tura goal khat thun mamawh Fiorentina an vanduai a, Denis Odoi chu minute 90+4-ah hnawhchhuah a ni. Si belhkhawma hnufual zawk an ni a, tlem zawk an nih vawk si vangin Club Bruges tan chet a har a, an si phurh an sut thei tawh lo. Goal dang luh belh a awm tak loh vangin Fiorentina chuan si belhkhawmah 4-3 in hnehna an chang a, final an lut ta a ni.
Fionrentina hian season liam ta khan Europa Confrence League final an lo lut tawh a, West Ham lakah uiawm taka tlawmin an champion zo lo. A zawna final an luh leh tak vangin champion ngei an tum tawh dawn a, final-ah hian Olympiacos leh Aston Villa te inkhela chak zawk zawk an hmachhawn ang.