May, 9, Ningani khan 1st MAP Ground, Armed Veng-ah GIG Motors Veteran Football Tournament 2024 final khelh a ni a, 2-1 a Ward IX hnehtu Lengpui Veteran an champion. Champion team hian Cheng nuai khat leh Trophy an dawng.
Final-ah hian Lengpui Veteran tan Rohmingliana a khel tha hle a, goal hnih a thun. Rohminga hian minute 21-naah hmahruaina goal a thun a. Ward IX tan Albert Lalbiakmawia’n minute 33-naah goal thuna an si phurh a sut hnuin Rohmingliana hian minute 45-naah hmahruai nawn lehna goal a thun a. Rohminga goal hnihna humhim tluanin, an champion pui ta a ni.
GIG Motors Veteran Football Tournament 2024 ah hian Lengpui Veteran champion puitu Rohmingliana chu ‘Best Player’ ah thlan a ni a. Mizo zinga footballer ngaihsan hlawh S. Malsawmtluanga chu ‘Top Scorer’ a ni ve thung.