Kawrtethawveng tlangval, tuna Bungkawn Veng, Aizawla cheng mek Hmangaihsangpuia chuan Russia ram khawpui lian pakhat Kazan-a khawvel pum buap sports discipline hrang hranga inelna BRICS Games 2024-ah India tan Karate intihsiak a hmachhawn dawn.
June 11-24, 2024 chhunga zawh fel tur he Games-ah hian Karate discipline senior -67 kg huangah India aiawhin Sangpuia hian a khel dawn a; Sports Authority of India, Mission Vengthlangah kum 2009 atanga training tan tawh, national level a gold medal engemawzat lo hlawhchhuak tawh, Commonwealth Championship-ah pawh gold medal hial awrh tawh a nih avangin Russia ramah pawh hian India medal beiseina pakhat a ni.
BRICS Games 2024-a tel tur hian selection hautak zet paltlang hmasak zet a ngai a, India team-a a tel theihna’n hian Mizoram State Sports Council leh All Mizoram Karate Association chuan theihtawp an chhuahpui a ni.
Sangpuia hi Hangzhou, China-a Asian Games 2023 khel turin a tling a, mahse, vanduaithlaktakin, Indian National Karate Team kha tirh an ni lo a, a kal thei ta lo a ni.
Tun Pathianni liamta mai khan Lengpui atangin Delhi-ah Indian conti ngent zawm turin a chhuk thla a, nimin zing dar 4:30 khan Delhi atangin Moscow panin an chhuak a, nimin vek khan Moscow atangin championship nghahna hmun Kazan an pan zui leh nghal a ni.
Indian contingent hi mi 123 awmna niin, Karate khel tur bik hi mi pariat an ni a, sports discipline dang – Athletics, Table Tennis, Rowing, Karate, Tennis, Wushu, Gymnastics, Canoe leh Boxing khel tur an kal tel bawk.
Khawvel ram hrang hrang 97 atanga chhuakkhawm infiammite zinga Mizo tel awmchhun Hmangaihsangpuia hi an bialtu MLA Robert Romawia Royte chuan Rs. 10,000 paiin, medal a lak chuan Rs. 1,00,000 pek a tiam zui bawk.
Bialtu MLA hian Delhi a thlen hnuah buaipuiin, Indian contingent awmna thleng a va thlah nghe nghe a ni.
Sangpuia chhuak tur hi All Mizoram Karate Association hruaitute’n Lengpui atangin an thlahliam a, beiseina sang tak nen hlawhtlinna chang ngei turin duhsakna an hlan a, Mizoram mipuite tawngtaipuina an ngensak nghal.