England in Euro 2024 final an lut

Germany a khelh mek Euro 2024 chu a hmawrbawk a hnai a, final a intum tur a hriat theih ta. July ni 10, Nilai zan khan semi-final hnuhnung zawk khelh a ni a, inkhel hmuhnawm takah England chuan 2-1 a Netherlands hnehin final an lut. England hian inelna neih meka khel tha tluang tak, an khingpui apiang la hneh vek Spain an hmachhawn zui leh dawn a. Final-ah tlawm zawn lovin, champion ve tawh ngei an tum hle ngei ang.

  • Bul tan tha Dutch

Football khawvela boruak nei lian em em, football neitu ang hiala inngai England hian Euro 2024-ah beisei angin an khel tha tawk lova, sawisel an hlawh. Beisei anga tha leh hmuhnawmin khel chhuak zo lo mah se an tlo viau thung a, tlawm an nei lo. An khingpuite lakah goal chhuah hmasa zawkah tan fo mah se tlawm an pumpelh a ni mai lova, an khingpuite lehthalin result nei tha zawk an ni zel. Semi-final an luh thlengin an tiatpui, an mahni anga football ram lian hmachhawn an la neih loh vangin Netherlands hi an tan fiahna hmasa an ni.

Team lian France lakah mit la taka lo inlan tawh Netherlands hian England lakah bul an tan tha hle a, goal an thun nghal thuai. Midfielder Declan Rice tihsual vangin PSG forward Xavi Simons chuan hun tha a nei. Inelna neih meka hmuhnawm taka inlan Simons hian chak taka a khalh tlang hnuin si nghal Jordan Pickford dan rual loha kawhin a pet goal a, minute 7-na lekah hmahruaina goal a thun. Hma takah goal an thun vangin Dutch ho an phur a, England tantute an hlauthawng hman hle.

  • Sawi zui hlawh penalty

Hma taka goal an chhuah hnuin England hian na takin an khingpuite an nawr let a, penalty sawisel hlawh tak hmangin an si phurh an sut thuai. Harry Kane chuan box chhungah goal thun ngei tumin ball a pet a, goal chungah a petchhuak hlauh thung. Kane ball pet lo dan tumin Netherlands defender Denzel Dumfries chuan a ke thawhin a lo tlawh. Dumfries ke hian Kane ke a fuh a, Kane hi kah thlak ang tawkin a tlu a. Inkhel thununutu Felix Zwayer chuan foul-ah ngai lovin a ham mai lo. England player te nawrna vangin VAR a rawn a, VAR rawn a nih hnuin penalty a pe. He penalty hi Harry Kane chuan tha zetin a pet goal a, minute 18-naah an si phurh a sut. England in an si phurh an sut theihna chhan penalty hian sawi zui a hlawh hle a, hun rei tak chhung chu inhnialna a nih zui a rinawm.

  • Watkins a rawn lang e

Minute 18 chhung lekin goal hnih lut hman mah se goal dang a luh belh har hle. Team hnih ten goal thun tumin thapui an thawh. Beisei phak bakin England an khel tha a, Dutch hoin rin ai daihin an khingpuite an ngam lo. Goal thun tumin innawr tawn chhen mah se goal a luh belh thei lawk lova, extratime an khelh a rinawm hman hial tawh.

Chak zawk an awm theih loh reng vangin England manager Gareth Southgate chuan player a thlak thleng a, inelna neih meka la khel lo Ollie Watkins a luhtir. Aston Villa player pawimawh Ollie Watkins hian rintlak a nihzia a lantir a, minute 90-naah goal pawimawh zet mai a thun a, England chakpuiin, final a hruai thleng. England hian Euro final an khel zawn dawn a, Spain an hmachhawn zui leh ang.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427