Mizoram leh Assam inrina ram in chuhna laiah Assam sorkarin an police Camp tur panna tur kawng an laih chu tih tawp tir an nih tawh thu Home Minister K Sapdanga’n a sawi.
Thuthar thehdarhtu thenkhatin an kawmnaah Home minister chuan ramriah Assam sorkar in hma thar an lak thawm an hriat veleh sorkarin hma a la nghal a, Vairengtea SDO (C) leh SDPO te chu Aitlang hmunah tirh nghal an ni a, thil thlen dan kim chang chu Kolasib DC hnenah an thlen nghal tih a sawi a. A la danin, Assam sorkar hian an police te camp panna kawng leiminin a hnawh chu thianfai angin in sawi mahse kawng hi a bal avangin an lai thar a, kawng pangngai bak a helna turte pawh an lo siam tih sawiin, hei hi kan mite ti lungawilo tu ber chu a ni, a ti.
Home minister in a sawi zel danin, Kolasib DC in a counyter part Cachar DC chu be pawp nghalin, ram in chuh laia an chetna chu remna thuthlung bawhchhiatna a nih theih thu leh a rang lama an mite hmalakna chu enfiah turin a ngen a. Cachar DC hian Police duty post panna kawng pawp lo thian fai mai an nih thu leh tunah chuan an lo duh tawk tawh thu in Kolasib DC chu a lo chhang a ni.
Sapdanga chuan, Kolasib leh Cachar DC te an in dawr hnu nimin atangin Assam sorkar in ramriah chet an la tawh lo a, kawng an laih chu tih tawp nghal a nih thu a sawi a,”Kutthlak chhunzawm a awm tawh loah kan ngai,” tiin thuthar thehdarhtute zawhna chhang bawk a ni.
Home Minister chuan ramri hrula, tuikhuah leh huan nei Mizoram mite chu Assam sorkar mite’n an vau nia sawi pawh an bawhzui nghal thu a sawi a, kan mite harsatna tawh chungchang hi Kolasib DC in Cachar DC a hrilh hre tawh a, tunah chuan an sawi fel thawhkhat tawhah kan ngai, a ti a; tunhnaia ramria thil thleng chu DC leh DC inkara sawi fel tawkah an dah tih a sawi bawk.