Paris khawpuia Summer Olympic neih meka Tennis inelnaah player langsar pahnih; Novak Djokovic leh Rafael Nadal te an intum a. Grand Slam-a champion ngun zawk Djokovic chuan set hloh lova hnehna changin third round a lut.
An vanglaia inel tawk em em, Grand Slam a champion tam fal pahnih: Novak Djokovic leh Rafael Nadal te inkhel tur hian ngaihven a hlawh a. Uaithla lam ni ve ve tawh mah se inhmachhawn tur an nih miau vangin an boruak a lian lo thei lo. Mipui beisei ang ngeiin inkhel hmuhnawm an lantir a, hliam damkawr Nadal lakah Djokovic a chungnung ta hlek thung.
Inkhel ngaihven hlawh takah hian Djokovic-a’n bul a tan tha a, set khatnaah break a nei zawn nghal zawt zawt. Nole hian game khat chiah hloh chungin set hmasa a la.
Set khatnaah beisei phak lovin, set hnihnaah bul tan tha lo mah se Nadal-a’n a zia a chhuah a, set hnihnaah na takin a khingpui a bei let. 0-4 ngawta a hnufual hnuin Nadal hian break a nei zawn a, game thum li ngawt a la ve leh hman hial. Inkhel hmuhnawm leh class sang zet an lantir nawn leh naah Djokovic a chungnung zui leh hram a, Serb hian 6-1, 6-4 a hnehna changin a elpui lian Nadal kawng a dal. Olympic-ah Djokovic hneh lova a tlak tak vangin Nadal hian Tennis a chawlhsan zui mai rinna lian tak a awm.
Thawhtan zana an inkhel kha Djokovic leh Nadal te vawi 60 an inkhelhna chiah a ni a, 31-29 in Djokovic a chungnung zawk a ni.