Nimin khan Lalmuanpuia Punte, Adiviser to Chief Minister (Political) Pisa ah Mizoram District hrang hranga Nodal Officer te chuan Scheduled Tribe Certificate pek chhuah dan rualkhai zawka kalpui a nih theih nan meeting an nei.
He hun hi Lalmuanpuia Punte chuan kaihruaiin Mizoram chhunga Scheduled Tribe-te, certificate pek chhuah danah nakin zela kan hnam tana pawi thei leh inven ngaihna lai te ngaihtuahho a ni a, a pek chhuah danah pawh fimkhur lehzuala kalpui dan turte an sawiho a ni.
Meeting-ah hian Mizoram chhunga Scheduled Tribe awmten Certificate an lak chhuah dawnin form awmsa zulzuia¬ dik tak leh fel taka Scheduled Tribe certificate an neih theih dan tur sawiho a ni a, Scheduled Tribe Certificate-a hnam dang inthun leh nakin zela Mizo hnam tana pawi thei leh inven ngaihnate sawiho a ni. Tin, District hrang hranga Nodal Officer kalkhawmten anmahni district huam chhung theuha uluk leh fimkhur taka Scheduled Tribe Certificate pek chhuah dan an kalpui thu leh hmalam hun atana thil tul hrang hrang an sawi a, an lo kalpui tawh dante ennawn a ni bawk.