Nimin khan Department of Mizo, Mizoram Christian College leh Mizo Language Development Board ṭangkawp chuan “Ni Khat Awh Mizo Ṭawng Zir hona” (One Day Workshop on Mizo Language) an buatsaih. Hun hawnna (Inaugural session) kaihruaitu PC Lalngaihzuala, HoD, Mizo Department, Mizoram Christian College chuan Mizo ṭawng tihhmasawn nana Mizo Language Development Board in an thawhpui hmasa ber college an ni chu lawmawm a tih thu a sawi a, Mizo ṭawng humhalhna leh chawikanna kawngah MCC chuan theihtawp a chhuah zel tur thu a sawi.
Lawmna thuchah sawitu Principal Dr. Tawnenga pawhin Mizo Language Development Board an thawhpui thei leh, Mizo ṭawng zir hona a tel tura mi ṭhahnem tak an lo kal khawm thei chu lawmawm a tih thu a sawi a. Synod hnuaia MCC felfai taka enkawl anih dan sawiin, kalkhawmte chu an dinhmun luah mek chu Pathian kohna a ni tih hria a, an thiltih mekah theihtawp an chhuah chuan, chu chuan a ṭha zawnga nghawng a neih ngei tur thu sawiin, Kohhrana hruaitute tih tur awma kan ngaih ṭhin hi Kristian kan nih avangin kan zavaia kan tih tur anih thu a sawi bawk.
Zirlaite chu an lehkha zirah an rinawm chuan, an ti mai mai thei lo ang a, an thatchhiat theih dâwn loh thu sawiin, mahni program buatsaih a tlai ngai lo mi ni turin a fuih bawk.
Zir hona sawihawngtu (Keynote Speaker) Pu R. Lallianzuala, Chairman, Mizo Language Development Board – in Mizo Language Development Board din anih dan leh hmalak tawh dan tlangpui sawiin, Mizo Thu leh Hla leh Ṭawng tihhmasawnna kawngah theihtawp an chhuah zel dâwn thu a sawi a, MLB hmalakna chu Politics thil a ni lo a, hnam thil a nih thu sawiin, chutianga an hmalakna kawnga MCC an thawhpui thei chu lawmawm a tih thu a sawi bawk.
He hunah hian Rozama Chawngthu leh Lalsangzuala, Assistant Professor, Mizoram University te Rawnpu (Resource Person) atan hman an ni a.
Zir hona hun khatnaah Rozama Chawngthu-in hun hmangin Mizo Ṭawng Kalphung tih thupui hmangin Mizo ṭawng thlûk nei anih dan, thumal tihdanglam dan, ri khat ṭawng anihnain awmzia a neih dan, thu inkawp, a hnuhnung sawi hmasak chi leh ṭawng chungchanga thil pawimawh hrang hrangte sawiin, ṭawng dang seng luh kara siamrem ngai awmte zirho turin a chhawpchhuah bawk.
Hun hnihna Rawnpu Lalsangzuala pawhin Zaizir leh ri thluk (Phonetics & Phonology), Thumal inzawm dan (Morphology), Sentence inzawm khawm dan (syntax), thumal leh sentence awmze sawina (semantic) chungchang bakah Mizo ṭawnga hman sual theih hrang hrangte sawiin, Mizo Ṭawng Grammar felfai taka siam a ngaih thu a sawi bawk.
Sawihona hunah kalkhawm leh Rawnpute hian heng thupui zirho leh Mizo Ṭawnga hmalakna tur leh mi nawlpui huapa hmasawnna leh inzir ngai laite an sawiho bawk a ni.
Sawihona hun hi Dr. Lalhlimpuii leh Lalremruati Ngente ten an kaihruai a, Lalchhuanawmi, 1st Semester, Mizo Department-MCC in kalkhawmte zaiin a awi a, he hunah hian MCC department hrang hrang 5th Semester zirlaite bakah, ICFAI University, Govt Johnson College leh Govt.T. Romana College Mizo Department zirlai leh zirtirtute an tel ve bawk.