GIG Motors I Day Football Tournament 2024 chu August 1, Ningani khan khelh chhunzawm a ni a, Aizawl FC chuan an khingpui Chawnpui FC chu 7-0 ngawtin an sawp. Ningania inkhel hnuhnung zawkah Mizoram Police FC chuan FC Bethlehem lakah hnehna an chang ve bawk.
- AFC 7-0 Chawnpui FC
I League leh MPL champion hlui Aizawl FC chu I Day Football tournament 2024 an hmachhawn hmasak berah tha chungchuang takin an inlan a, an khingpui Chawnpui FC chu 7-0 ngawtin an sawp. AFC tan hian Lalhriatpuia leh Lalbiakdika ten goal hnih ve ve an thun.
Aizawl FC hian Chawnpui FC lakah bul an tan tha hle a, inkhel tan atanga minute 10-na lekah Lalhriatpuia chuan hmahruaina goal a thun nghal. Hma taka goal an thun vangin inrintawkna sang zawk nen an inlan, Chawnpui FC in goal thun tur khawpin an nawr let thei lo. Lalhriatpuia goal thun hnu hian Lalbiakdika chuan minute 22-naah AFC goal hnihna a thun a, 2-0 a hmahruai chungin chawlhlawk an hmang.
Si hnih faia hmahruai tawh Aizawl FC hi chawlhlawk hnu lamah an khel tha leh zual a, goal nga ngawt an thun belh. Minute 59-naah Lalbiakdika chuan an goal thumna a thun a, C Lalmuanpuia chuan minute 68-naah an goal lina a thun belh zui leh zat a, minute 70 an khelh tlin hmain chak tur zawk a chiang thei der tawh. AFC hian goal li ngawt thun tawh mah se an la duhtawk mai lova goal thum ngawt an thun belh zui leh.
Goal hmahruai thuntu Lahriatpuia chuan minute 70-naah an goal hnihna a thun a. Goal nga an thun hnu hian Laltlanzova leh Pazawna ten goal an thun belh zui leh a, 7-0 ngawta hnehna changin point thum an hmu zui ta a ni.
- MPFC in FC Bethlehem an lehthal
Ningani a inkhel hnuhnung zawkah MPL champion Mizoram Police FC chuan MPL club thar FC Bethlehem lakah si an phur hmasa a, hun rei tak hnufual zawk an nih hnuin hun tawp dawn hnaiah goal hnih an thun thei hram a, harsa takin an khingpuite an lehthal.
He inkhel hmuhnawm takah hian FC Bethlehem tan Lalrochama chuan minute 33-naah hmahruaina goal a thun. Rochama goal hmang hian hun rei tak chhung hma an hruai a, hun tawp dawn hnaihah goal hnih an chhuah ta hlauh thung. Veteran striker Malsawmfela chuan a thiam a la theihnghilh lo tih lantir nan minute 81-naah an si phurh sutna goal a thun a. Hun pangngai tawp hnu minute 90+3-ah Lalbiakthanga chuan goal pawimawh zet thunin Police team a chakpui a, point thum hlu tak an hmu zui ta a ni.