Nimin, Thawhtanni khan Dr. Lalmalsawma Nghaka, Mizoram Pradesh Congress Committee Treasurer chuan ITI Veng High School building mumal awm lo kara naupangten zirlai an zir chu a hmunah a tlawh.
ITI Veng High School hi kum 1992 khan din a ni a, kuminah hian zirlai 70 an nei mek a, pawl 10 zirlai 33 niin pawl 9-ah zirlai 37 awmin zirtirtu 8 an awm mek a ni. ITI High School hi Adhoc-grant-in-aid niin kum 2023 inthlan dawn hnaiah khan MNF sorkar chuan sorkar sikulah a hlangkai a. ZPM kaihhruai sorkar in cancell leh in an dinhmun ngaiah an dah let leh a, an school uniform-ah Govt. HS anga an lo chhut tawh avangin an buai phah hle nghe nghe a ni.
He school building hi a chhe tawh hle a, tui a far nasa in, a chung slab a chhiat avangin ceiling atangin cement a tla thin a ni. He school building hi 64. 05 lakhs senga sak that mek a ni a, a building hlui structure ringa sak theih a nih laiin contractor tana senso tlem zawk a nih avangin a kawt zawl hmun remchangah building thar sak niin feet 14.5 chhungkhung a niin, a chhung a tet em avangin school in an thutthleng neih sa pawh a leng lo a, a thar an siam phah a ni.
He school building thar hi MNF Block hotute hna niin an sawi a, ZPM a sorkar tak hnuah Education Directorate lam miin a enkawl/lei sak nia hriat a ni a, June thla atang khan hnathawktu hmel an hmu ngai tawh lo a, school building sak hi tu mawh ber nge tih school zirtirtute hian an sawi thei lo a ni. Tunah hian a building hlui hi luah tlak a nih loh avangin building thar hi sak zawh la ni lo mahse luah loh theih loh a ni a, kawngkhar leh tukverh siam ala ni lo va, kawmchhak lungrem pawh foundation mumal lo a nih avangin a min a hlauhawm hle bawk a ni.
ITI Veng High School tlawhtu Dr. Mala chuan, “ITI Veng High School Headmaster, James Lalthanmawia leh a thawhpui te an fakawm hle. Sikul result a tha thin a, School kai naupang pawh a ngah pawl an ni thei zel hi a lawmawm,” tiin.
“Pu James-a, Headmaster in he school -a fate a zir chhuah tir ngat ngam hi a chhuanawm hle a, zirtirna quality chungchangah Staff te an in rintawk zia langin, Sawrkar sikul dang enkawltute pawn ITI Veng High School atang hian zir tur an ngah hlein ka hria,” a ti a.
“He Sikul pawimawh tak leh zirlai ten nasa taka rinna an ngahna sikul ni mek hi Sawrkara thu neituten ngaihven thuai turin kan duh” a ti bawk.
Dr. Mala hi Lalhmachhuana (Anggu-a), Chairman MPCC Education Cell leh H. Lalduhawma, Aizawl S-II Block Congress President ten an tawiawm a ni.