Kar tawp khan Europe a tualchhung league lian zual panga, EPL, La Liga, Italian Serie A, Bundesliga leh French Ligue 1 te khelh chhunzawm a ni a, hnuhma langsar a awm belh nual. Kar tawpa football hnuhma langsar zual kan hrut kual leh ang.
- English Premier League
Pathianni zan khan English club zinga inhal chiangkuang ber Manchester United leh Liverpool te Old Trafford-ah an inkhel a, Liverpool in 3-0 ngawtin hnehna an chang. Liverpool hian Old Trafford a inelna hrang hrang an hmachhawn hnuhnung vawi thumah hnehna an chang zo lo tawh a, Pathianni zan khan phu takin hnehna an chang ta thung.
United lakah hian Liverpool player pawimawh Mohamed Salah chuan goal a thun. Salah hian inelna hrang hranga United a hmachhawn hnuhung vawi 7-ah goal 11 zet a thun. Aigupta tlangval Salah hian United lakah goal 15 a thun tling tawh a, EPL ah United lakah a zawna khelh nga chhung goal thun zawn awmchhun a ni bawk.
Liverpool manager thar Arne Slot hnuaiah Liverpool chu EPL-a an match hmasa pathumah goal chhuah lovin an chak. Arne Slot hi Steven-Goran Eriksson hnu lamah EPL match hmasa pathumah goal chhuah lova chak thei awmchhun a ni. Van kohna chhang ta Steven-Goran Eriksson chuan kum 2007 khan City a enkawl tirhin a match hmasa pathumah goal chhuah lovin hnehna a chanpui.
Inrinni zan khan champion lai Manchester City chuan 3-1 in West Ham United an hneh. City chakna goal thumte hi Erling Haaland thun vek a ni. Haaland hian season thara an match hmasa pathum atangin goal 7 ngawt a thun a, EPL-ah match hmasa pathum atanga goal 7 thun thei hmasa ber a ni. Haaland hian City tan EPL-ah vawi 69 khelin goal 70 a thun tawh a, Kevin de Bruyne lehpelin City tan EPL-a goal thun hnem pathumna a ni. Haaland chungah hian Sergio Aguero (184) leh Raheem Sterling (91) te an awm. Haaland hian EPL-ah hattrick vawi 8 ngawt a siam tawh a, EPL a hattrick siam hnem palina a ni mek bawk.
Inrinni zan khan Arsenal leh Brighton te 1-1 in an inhnehtawk. He inkhelah hian mak tak maiin Arsenal midfielder pawimawh Declan Rice hnawhchhuah a ni. Rice hian EPL match 245 a hmachhawn tawh atangin vawi khat chiah red card a la hmu.
Chelsea tan Cole Palmer a chetha chhunzawm zel a, goal 13 a thun bakah assist vawi 15 a nei tling bawk. Palmer hi season hnih chhungin Europe’s top 5 league-sh goal 15 thun a, assist vawi 15 nei tling bawk awmchhun a ni.
- Spanish La Liga
Pathianni zan khan Real Madrid chuan Kylian Mbappe goal hnih thun hmangin Real Betis an hneh. Real Madrid hi an muala inelna hrang hrang an hmachhawn hnuhnung vawi 35-ah tlawm an nei lo. Hei hi kum 2012 hnu lamah an mualah tlawm nei lova an kal tluan rei leh ber tum a ni a. Real Madrid hi inelna hrang hrangah tlawm nei lova an kal tluan rei ber tum chu April 2026 – January 2017 chhunga vawi 40 zet tlawm an nei lo zawn kha a ni.
Real Betis manager Manuel Pellegrini chuan La Liga vawi 488 a hmachhawn tling ta chiah a, manager zingah La Liga hmachhawn hnem pariatna a ni a, Barcelona manager Ferdinand Daucík a nih rual. Pellegrini hian Real Madrid a ngam lo viau a, Real laka a record hi 11% (3-11-14; W-D-L) a ni.
Barcelona chuan Inrinni zana an khingpui chu 7-0 ngawtin Real Valladolid an sawp. Hei hi April 20, 2016-ah 8-0 ngawta player 10 Deportivo la Coruña an hneh hnua an chak chian ber tum a ni. 7-0 ngawta Real Valladolid an sawp tum hian Raphinha chuan hattrick a siam a, hei hi club leh ram tan hattrick a siam vawi khatna a ni. Raphinha hi Brazil player zingah La Liga-a hattrick siam thei parukna a ni bawk.
IFFHS chhinchhiah danin Barcelona player pawimawh Robert Lewandowski chuan club leh ram tan goal 634 a thun tling tawh a. Football player zingah goal thun tam pariatna a niin Bayern Munich superstar Gerd Müller nen an goal thun a inzat ta chiah.
La Liga season tharah Sevilla an khel chhe tluang a, vawi li an tlawm zawn tawh. Hei hi 2001-02 hnu lamah La Liga season tharah vawi li an tlawm zawn hmasak ber a ni. Sevilla hi an tlawm zawn rei ber tum chu 2nd division an khelh lai 2000-01 khan a ni a, vawi ruk an tlawm zawn.
- German Bundesliga
Pathianni zan khan Bayern Munich chuan 2-0 in an mikhual SC Freiburg an hneh. He inkhelah hian Thomas Muller chuan Bayern Munich tan a cawi 710 nan a khel a, Bayern Munich tan inelna hrang hrangah khel hnem ber record a siam a. Bayern si nghak ropui, Bayern tan vawi 109 zet khel tawh Sepp Maie record a khum chiah. Muller hi Bayern Munich tan Bundesliga-ah goal 150 thun tling thei palina a ni a, Gerd Müller (365), Robert Lewandowski (238) leh Karl-Heinz Rummenigge (162) te nen huang khatah an awm. Müller hian a zawnin season 16 chhung ngawt Bundesliga a hmachhawn tawh a, he tiang ti thei pangana a ni a, Holger Fach, Mats Hummels, Bernd Nickel, Olaf Thon leh Michael Zorc te record a nihrual.
Inrinni zan khan Everton leh Bayer Leverkusen te chu an mualah 2-0 in hma an hruai hnuin tlawm zawkah an tang ve ve. Oct. 22, 2023 hnu lama Top 5 European leagues-ah si hniha hmahruai tawh chunga a rualna tlawm ve ve an awm lehna hmsa ber a ni.
- French Ligue 1
Champion lai Paris St-Germain chuan season thara an khel hmasak pathum atangin goal 13 ngawt an thun a, kum 50 zet hnuah hetiang hi Ligue 1-a a thlen vawi hnihna a ni. PSG hian 2022-23 season khan an match hmasa pathum atangin goal 17 lai an lo thun tawh bawk.
Manchester United in an chhawr duh tawh loh Mason Greenwood chu Ligue1 lamah a vul hle. Greenwood hian Ligue 1-a a game hmasa pathum atangin goal 5 a thun der tawh a. Mario Balotelli (2016) hnu lamah he tiang ti leh thei hmasa ber a ni.