September 10, Thawhleh zan khan UEFA Nations League khelh chhunzawm a ni a, League A lama inkhelah Germany leh Netherlands te an inhnehtawk. Netherlands muala tlawm pumpelh Germany hi Group 3 hmahruaitu an ni.
League A, Group 3-a inkhel ngaihven hlawh takah Netherlands chuan Johan Cruijff Arena, Amsterdam-ah team lian Germany an mikhual. Netherlands leh Germany te hi an match khatnaa hnehna chang ve ve an ni a. Group 3-ah hian team lian fal pahnih an ni bawk. An inkhela chak zawk zawk hian group champion theihna hun tha an neih zui theih vangin an inkhel hian ngaihven a hlawh hle. Inkhel ngaihven hlawh takah hian Netherlands in bul tan tha viau mah se an mualah an chak zo bik lova, Germany nen hian 2-2 in an inhnehtawk.
Johan Cruijff Arena, Amsterdam-ah mualneitu Netherlands in bul an tan tha viau a, inkhel tan atanga minute hnihna lekah Tijjani Reijnders chuan Netherlands hmahruaina goal a thun. Hma takah goal an thun vangin an phur viau a, Ronald Koeman-a team te hian inrintawkna sang zawk an neih phah. An mualah inrintawk sang zawk leh phur thar zawkin inlan mah se team lian lakah an goal an venghim reng thei lova, chawlhlawk hmain hnufual zawkah an tang ta hial zawk.
Julian Nagelsmann hnuaia indinthar leh mek Germany hian hma takah goal chhuah mah se team huaisen an nihzia an lantir a, ngampa takin Mimualah an inlan. Netherlands lakah goal chhuah hma viau mah se an zam lo. Deniz Undav chuan minute 38-naah goal thunin an si phurh a sut. Undav goal thun hian a fuih phur nasa leh zual a, goal an thun belh leh thuai bawk. Player tawn hriat ngah Joshua Kimmich chuan minute 45’+3-naah hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Netherlands an khel tha chhunzawm a, goal an thun hma leh viau. Second half tan atanga minute ngana lekah Denzel Dumfries chuan goal thunin an si phurh a sut. 2-2 a nih hnuin inkhel a hmuhnawm zui viau naa goal dang a luh belh thei tawh lo. Inkhel hmuhnawm tak hi chak zawk awm lovin a tawp a, Netherlands leh Germany ten point khat ve ve an hmu.
League A, Group 3-a inkhel dangah Hungary leh an mikhual Bosnia and Herzegovina te chu goal awm lovin an inhnehtawk ve thung. Group 3-ah hian khelh hnih atanga point li hmuin Germany in hma an hruai. Germany ang thovin point li hmu tawh mah se goal difference-ah an chhiat zawk vangin Netherlands in pahnihna an luah a. Hungary leh Bosnia ten point khat ve ve an hmu tawh bawk.