Thawhleh zana Nations League khelhah Harry Kane chuan England tan vawi 100 a khel tling. England tan century a siam zanah captain Harry Kane chuan goal hnih a thun. Kane goal hnih thun hmangin Three Lions hian an mikhual Finland chu si hnih faiin an hneh.
Season liam taah an chet that loh vanga League B lama tlahniam England hian Wembley Stadium-ah Finland an mikhual. An mikhual lakah manager lai lawk Lee Carsley hnuaiah Three Lions an khel tha leh viau a, an mualah phu takin hnehna an chang. Finland lakah khel tha viau mah se chawlhlawk hmain goal an thun thei bik lo. Chawlhlawk hnu lamah tha zual zawkin an inlan, goal hnih an thun.
England tan hian captain Harry Kane chuan bul a tang a, ram tan a vawi 100 nan a inlan tling chiah. England senior team tan vawi 100 a khel tlinaah hian Kane hian minute 57-naah hmahruaina goal a thun. England tana goal thun hnem ber ni mek Kane hian minute 76-naah an goal hnihna a thun belh zui leh a, an hmahruaina a tizau. Kane hian Finland lakah hattrick siam teuh hle a, a goal thun pakhat chu offside vangin hnawl a ni hlauh thung. Three Lions hian goal thun belh teuh viau thin mah se Finland si nghak Lukas Hradecky an paltlang zo tawh lova, goal an thun belh thei tawh lo. Goal dang thun belh thei tawh lo mah se an mualah si hnih faia chakin point thum an hmu ta tho thung. England hian manager lai lawk Lee Carsley hnuaiah vawi hnih an khel tawh a, hnehna an la chang ve ve. A tha nghah nana an rawih rih Lee Carsley hian a ngheta England manager ni zui thei turin chet that zui a mamawh viau tura ngaih a ni.
Finland lakah England tana goal hnih thun Harry Kane khan kum 2015 atangin England senior team tan a khel tan a, inelna hrang hrangah vawi 100 khel tling tawhin, goal 68 a thun tawh a, England tana goal thun tam ber a nihna tipung deuh deuh zel. Kum 39 zet ni tawh chunga club leh ram tan goal la thun zak zak thei Cristiano Ronaldo chuan Kane hi phurna tam tak a pe thar a. Ronaldo vang hian Kane hian ram tan hun rei zawk inkhel a tum phah.
League B, Group 2-a inkhel dangah Grecee chuan mikhual an nihna mual Aviva Stadium-ah si hnih faiin mualneitu Republic of Ireland an hneh a, point thum an hmu. Greece tan hian Fotis Ioannidis leh Christos Tzolis ten goal khat ve ve an thun. League B, Group 2-ah hian khelh hnih atanga point ruk hmuin Greece in hma an hruai a, khelh hnih atang thova point 6 hmu England in pahnihna an luah. Greece leh England in point 6 ve ve an hmu lai hian Finland leh Republic of Ireland ten point an la hmu ve lo thung.