Nimin khan Congress Party chuan Congress Bhavan-ah ‘Friday Political Session’ kan hmang a. He hunah hian Lal Thanzara, President, MPCC chuan thusawi in, “Tunlaia kan titi tam ber, Chanchinbu leh Youtube ah te lang tam ber chu kan kawngpui chhiat chungchang hi a ni. Congress sawrkar lai 2018 inthlan dawn hnaiah furpui kan tawng a, lo pawh March ni 15 hma khan a hal hleihtheihloh a ni. Chutiang karah chuan kawngpui siam a har khawp mai. Sairang leh Buichali inkarah lung nuai tamtak man bungraw phur lirtheiin a rap pil a ni. Khatih lai khan MNF khan min bei nasa em em a, kan kawngpuiah te buh te an phun a, min elsen nasa em em anih kha, a ti a.
MNF an lo sawrkar a, kan hun laia furpui ang kha an tawng ve lo chungin an kawng chu a tha bik chuang reng reng lova, khatih lai khan thenkhat ten a elsen nan kawngpuiah sangha te an chhuah anih kha. Tuna kan sawkar hrawn lai mek hian working season an tih, kum tir lamah kawng siamthat ngaihtuah lovin, hmalakna chang an hre lova. Tunah phei chuan tuilet hnu a kawng chhiat ber tum kan thleng ta, a vanduai thlak hle a ni. Sawrkarin kawngpui a khar hial ngai khawpin kawngpui a chhia a, vai Driver ten min elsen a, min nuihzat mek a ni. Hnam dang, ringlo mi Minister in, ‘Hetiang khawpa kawng chhia te chu, sawrkar hi Court a khin tlak a ni’ min ti a ni. Mizote hi thil a nihna tak ngaihtuah lova tawngtaw insawichhiat kan ching a, kawng chhiat chungchangah hi chuan party pathum te hian in elsen dan tawk kan thiam tawh ang chu maw? tia sawiin.
Kan sawrkar kal tawh Congress emaw, MNF emaw ten Economic programme eng nge an kalpui tawh tih te hi kan zirchiang peih lo niin ka hria. Kan NLUP Programe te kha sum semna mai mai a ni ti ten min sawichhiat sak a. Keini kan sawrkar lai khan Rangva inchung nei ngai reng reng lo ten rangva inchung kan sem vangin an lo neih phah a, NLUP vangin tam takin huan puitling takin an neih phah a ni. Tuna kan CM hi kan NLUP min sawimawi puitu tha tak ani tih pawh Vanapa Hall ah a sawi kan hriat kha. Ani hi a awmna azirin a thusawi a danglam thin vang maia tuna a sawi dan thlak leh ta a ni, a ti a.
Kan sawrkar lai khan huan lo ram panna kawng km 2500 chuang kan lai a ni. LPS Kuthnathawk Huang kan en pawh hian a tam zawk hi NLUP vanga hlawhtling a ni tih kan hmu a ni. NLUP khan UNO te a ko chhuak a, project pathum lai an kalpui a ni. Chutih lai chuan Congress Sawrkar khan engmah an ti lo an ti thin hi awih mai kan tam thin a, kan kalsual mek a ni, a ti a.
Tunhma chuan RTI zawhna te hi Official ten file a inziak angin an chhang mai thin a, file a inziak bak tihdanglam thiang a ni lo. Tunah erawh chuan kan Minister ten an enpui zel tawh a, an duh angin an ziak mai niin a ngaih theih a, Chanchinbu ah te kan hmu a ni. Kan Chief Minister berin RTI thianghlimna leh hlutna tidanglam thei tur zawnga RTI a rintlakloh a ti te hi a awm ang lo hle in ka hria, a ti bawk.
Congreess president chuan hmanni lawka MNF Treasurer Pu Ruatkiman MPCC hruaitute term pawhsei chungchang sawi in, kan party chhung boruak a tha lo hle niin a sawi a. Kha thil kha MPCC Executive meeting in a rel a ni a, khami ni khan Pu Ruatkima hi awm ve se, kan party boruak that zia hi hmu ve se khatiang thil kha a sawi duh ka ring lo, a ti.
Vawiin ni ah hian Congress mipui zawng zawng ten keini Congress hotute ah nilo hian, Pathian ah beiseina nei a, tawngtaina a hotute finna leh party hruai thiamna min dilpui turin ka chah duh che u a ni” a ti bawk.
Congress party inkhawm hi Samuel Lalvawng, Secretary, MPCC chuan a kaihruai a, T. Sangkunga, Ex-MLA chuan Central Politic report a pe bawk.