Champion lai Manchester City lakah uiawm taka an chak zawh loh hnuin Arsenal chuan hnehna an chang leh ta a, inrinni zana an mikhual Leicester City chu 4-2 in an hneh. Inrinni zana inkhel dangah Chelsea an chak a, season thara a vawi khat nan Everton an chak ve nawlh bawk.
- Arsenal an chesual teuh
Season tharah tlawm la nei lo Arsenal hian Emirates Stadium-ah Leicester City an mikhual a, chawlhlawk hmain goal hnih an thun. 2-0 a hma an hruai bakah an game a ngheh that em vangin Gunners hi chak ngei tura ngaih an ni hman. Chawlhlawk hmaa khel tha tak Arsenal hian chawlhlawk hnu lamah goal hnih an chhuah zawn a, an mualah an chesual teuh hle. Hun pek belh tawp dawn hnaih lamah laipui vawi hnih a puak thei hram a, Gunners hian harsa takin hnehna an chang.
Chak mamawh Arsenal hian an mualah bul an tan chhe lo viau a, goal pawh an thun har lo. Fuh takan an mikhualte an nawr tlang hnuin minute 20-naah Gabriel Martinelli chuan Jurin Timber siam sak atangin fing takin a pet goal a, hmahruaina goal a thun. Martinelli goal thun hnuin Gunners an khel tha chhunzawm viau a, chawlhlawk hmain goal an thun belh leh hman. Leandro Trossard chuan minute 45’+1-naah Gabriel Martinelli siamsak atangin an goal hnihna a thun a, 2-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm lehzual a, goal li ngawt a luh belh. Second half tan atanga minute hnihna lekah James Justin chuan Buonanotte freekick chhuih tha tak chu chiang zetin a tauh goal a, an si phurh a sut then. Tlarhnung khawng tak Arsenal lakah goal an thun vangin Foxes an phur a, an chetha zui viau bawk. Phur tharna sang tak nena inlan Foxes tan hian James Justin chuan minute 63-naah pui zetin a pet goal a, an si phurh a sut zo ta nge nge.
An hmahruaina an hloh fel hnuin Arsenal in goal thun ngei tumin tan an khawh a, Leicester City in an goal venhim tumin tan an khawh ve thung. An mualah chak ngei tuma inlan Gunners hian goal thun lawk thei lo mah se hun tawp dawn hnaih lamah an vannei ta nge nge a, goal hnih an thun. Gunners in si nghak chetha zet mai Mads Hermansen an paltlang theih loh reng hnu, hun pek belh minute 90+4-ah Wilfred Ndidi chuan vanduaithlak takin an lamah a ti-goal a, Arsenal hmahruai nawn lehna goal a thunsak.
Hma hruai nawn leh mah se Arsenal in goal thun belh ngei an tum a, hun tawp dawn tepah an an vennei nawn leh. Foxes tlarhnung chetsual vangin Kai Havertz chuan minute 90’+9-ah vanneihthlak takin an goal lina a thun a, an chakna a nem nghet. Havertz goal thun hnu lawk hian hun a tawp zui a, Arsenal chuan an mualah harsa takin hnehna an chang zui ta a ni.
- Palinaah Chelsea
Season liam taa beisei phak lo Chelsea chu season tharah an khel tha ta hle. Blues hian Stamford Bridge-a an mikhual Brighton & Hove Albion chu Cole Palmer goal li thun hmangin an hneh a, palinaah an inhlangkai.
Stamford Bridge a lenglut Brighton in bul an tan tha a, goal thun hmasa zawkah an tang. Season kal meka tlawm la nei lo Brighton tan hian Georginio Rutter chuan inkhel tan atanga minute 7-na lekah hmahruaina goal a thun. Hma takah goal chhuah mah se Chelsea an buai lova, goal thum an thun zawn. Blues tan hian Cole Palmer chuan goal thunin, minute 21-naah an si phurh a sut. An si phurh sutna goal thuntu Palmer hian minute 28-naah an goal hnihna a thun hnuin minute 31-naah penalty atangin an goal thumna a thun zui leh a, hattrick a siam.
Goal thum ngawt an chhuah zawn hnuin Brighton in tan an khawh thar a, Carlos Baleba chuan minute 34-naah goal thunin an si phurh a sut then. Goal an thun vanga Brighton an phur thar leh hnuin Blues an che fuh nawn leh. Goal thum thun tawh Cole Palmer chuan minute 4-1-naah an goal lina a thun zui leh a, an hmahruaina a tizau nawn leh. Brighton laka Chelsea tan goal li thuntu Cole Palmer hi EPL ah Chelsea tan chawlhlawk hmaa goal li thun thei hmasa ber a ni.
Season kal mekah a vawi khat nan Brighton tlawm tirtu Chelsea hian khelh ruk atangin point 13 an hmu a, palinaah an inhlangkai. Palinaa awm Chelsea leh hmahruaitu Liverpool te hi point hnih chiahin an inthlau a, season kal mekah hian champion tuma inelna boruak a nung tha hle tura ngaih a ni.
- Everton an chak ve ta
Season tharah bul tan chhia, khelh li chhung tlawm zawn hman Everton chuan 2-24-25 season-a a vawikhat nan hnehna an chang a, Goodison Park-a an mikhual Crystal Palace chu 2-1 in an hneh.
Goodison Park-ah Palace in bul an tan tha a, club liante ngaihven Marc Guehi chuan minute 10-na lekah hmahruaina goal a thun. Hma takah goal chhuah mah se Everton tan Dwight McNeil chuan second half tir lamah goal hnih a thun zawn a, an mualah hnehna an chang zui ta a ni.