MIZO INCHAI TITLE FIGHT (PATE)
Lalchhanhima (39th AR, Saitual) bt B Lalawmpuia (Saitual, champion lai)
= 20-0 (Thawh 10 turah thawh sarih thleng an inchai a, hliam vangin Awmpuia’n a bei zui thei lo. An inchai chhungin Chhanhima a chungnung hrim hrim a ni.)
- THAWH 1-NA : Awmpuia’n a nawr chhuak teuh hle a, Chhanhima insiam thain a nawr let a, point hmu lovin an tluan. (0-0)
- THAWH 2-NA : Champion lai Awmpuia tuan a rangin thiamna tha tak nei mah se amah aia kg lia rit leh pumraw lian zawk lakah tharum a ngah tawk lo va, a kuai zangthal teuh hle. (0-0)
- THAWH 3-NA : Chhanhima a nghet a, tharum ngah zawk a nihna lantirin a la fuh a, a bawkkhupin vawi 10 chhiar thleng a bawhbet. (Chhanhima 10-0)
- THAWH 4-NA : Awmpuia’n bawhbet let tum viau mah se point hmu lovin an tluan. (0-0)
- THAWH 5-NA : Tha taka inveng tawnin derthawng lovin an hmang tluan. (0-0)
- THAWH 6-NA : Tuan rang zawk a nihna chhawrin Awmpuia a che fuh tep a, mahse, Chhanhima a tal chhuak. A tawp dawnah an intauh. (0-0)
- THAWH 7-NA : Eng emaw chen hliam vanga bawihsawm a nih hnuah Awmpuia’n an tan rualin a nawr a, bawhbeh ngei tuma a beih luatah Chhanhima’n a nawr let a, dar betin vawi 10 chhiar thleng a bawhbet. (Chhanhima 10-0)
- An intauhnaah Awmpuia’n a beng vei lam hnungah hliam na tham tak a nei a, a bei zui thei lo. 2004 atangin Chhanhima’n inchai a luh chilh a, title fight hnuhnung ber 2022 khan Awmpuia hneh lovin champion kawnghren a hloh a, a inkhelh chhunga amah bawhbettu awm chhun a ni. Chhan let ngei a tumna puitlinin tum hnih bawhbetin champion kawnghren a la kir a, an inchaina chhuatah a pheikhawk phelhin kum 35 mi Assam Rifles hian rilru khawih takin inchai a chawlhsan tih a puang.
LAWMMAN : Title humhim zo lo mah se champion lai a nih avangin Awmpuia’n Rs 50,000 a dawng a; champion chotu Chhanhima’n Rs 30,000 la mah se a duhthusam tipuitlingin inchai a chawlhsan.
MIZO INCHAI TITLE FIGHT (NUTE)
Lalvenhimi (Bethlehem, champion lai) bt Lalnuntluangi (Kolasib)
= 21-2 (Thawh nga an inchai)
- THAWH 1-NA : Tharum leh thiamna nei a nihzia Venhimi’n lantirin a kuai zangthal a, vawi 10 chhiar thleng a bawhbet nghal. (Venhimi 10-0)
- THAWH 2-NA : Tluangi’n beiseiawm takin a bei let a, a nawr chhuak. (Tluangi 1-0)
- THAWH 3-NA : Bawhbeh a tum luatah Tluangi tan hmun a phet a, Venhimi nawr letin vawi 10 chhiar thleng a bawhbet. (Venhimi 10-0)
- THAWH 4-NA : Tluangi’n chak turin hun tha a nei tam tawh lo va, thawh hnih la awmah vawi 10 chhiar thleng a bawhbeh ve ve a ngai. Mahse, a puitlin thei lo va, vawi khat a nawr chhuak. (Tluangi 1-0)
- THAWH 5-NA : Venhimi a nghet a, nalh takin Tluangi a theh chhuak. (Venhimi 1-0)
LAWMMAN : Champion lai Venhimi’n champion kawnghren a humhim rualin Rs 50,000 a dawng a; Tluangi’n title fight hnuhnung ber 2022 ang bawkin Venhimi a hneh lo leh a, champion chotuin an dawn zat Rs 30,000 a la.
FREESTYLE WRESTLING (EXHIBITION)
Franky Ramthanpuia (Mamit) bt Lalthlamuanpuia (East Lungdar, Serchhip Dist)
= 4-0 (by fall classification point)
- Khelh tluan ngai lovin Thanpuia’n zangthalin a bawhbet.
Victor Lalnunpuia (NRC RSC Aizawl) bt Lalruatpuia (Khelo India Kolasib)
= = 4-0 (by fall classification point)
- Khelh tluan ngai lovin Nunpuia’n zangthalin a bawhbet.
Bronson Lalchhanchhuaha (Serchhip) bt Lalnunpuia (NRC Kolasib)
= 3-1 (classification point)
Lalthlengliana (NRC RSC Aizawl) bt R Vanlalmuana (NRC RSC Aizawl)
= 3-1 (classification point)
- Freestyle Wrestling (Exhibition)-a inchaiten Rs 2,500 vek an dawng.