Novak Djokovic chuan Jiri Lehecka hnehin Australian Open quarterfinals a lut a, mite nghahhlelh angin Carlos Alcaraz nen an inhmachhawn zui dawn.
Djokovic hian Grand Slam nomawi 25-na lak tumin a bei zel a, 6-3 6-4 7-6 (7-4)-in Czech 24th seed lakah hnehna a chang.
Alcaraz nen a thiam pali zinga tel turin an inhmachhawn zui dawn a. Spaniard hian Pathianni chawhma lamah quarterfinal a lut a, British No. 1 Jack Draper hmachhawnin a kawng na avangin Draper hi a khel tluan thei lo.
Alcaraz-a hian Wimbledon final hnuhnung pahnihah Djokovic hi a hneh a; mahse, Serb hian nikum nipuia Paris Olympics final-ah khan kum 21 mi hi hnehin gold a la a, ‘a hlawhtlinna ropui ber’ tiin a sawi zui.
Djokovic-a hi Lehecka-a’n set lina a khelh thlenpui hnuah boo pawh a tawk a, Australian Open champion vawi 11 lo ni tawh hian rang takin hnehna a chan hnuah Rod Laver Arena a chhuahsan nghe nghe.
“Zanina min tanna avangin lawm thu ka sawi a, min thlawpna ka hria a, round dawt lehah kan inhmu leh dawn nia,” tiin kum 37 mi hian a sawi.
Inkhel dangah 2nd seed Alexander Zverev chuan set hnihnaah talbuai deuh mah se 6-1 2-6 6-3 6-2-in French tlangval, Ugo Humbert chu hnehin quarterfinal a lut.
Nikuma Roland Garros leh 2020 US Open runner-up hian a vawi 14-na atan Grand Slam quarter-final a lut a, tun thlengin champion a la nei lo thung.
German hian American 12th seed Tommy Paul chu a hmachhawn leh dawn a. Paul-a hian minute 87 chhung lekin 6-1 6-1 6-1-in Spanish tlangval, Alejandro Davidovich Fokina a hneh a ni.