- K. Hmingthankaia
Duh duh sawi thianna nilo, duh duh sawi theihna, Democracy rama awm manah keini angduang, lawr pawh pass lo, khawi veng emawa Tuikhur Committee pawha tel pha lo tur tih hriat rengte pawh hian, duh zawng leh vei zawngte kan nei ve thei tho si a. Kan rilrua thil awm leh, tha tur nia kan hriatte chu inthlahrung lo takin kan sawi ve phawng phawng zel mai a nih hi. Kan thuziakte lah chu miten engtinnge an lo ngaih ang tih dawn lek lovin, chhuang zawk niawm takin, a tawpah kan hming pumte chu zam map lovin kan la ziahhnan kalh lehta nghal thin a nih hi. Chutianga mawl taka kan thu sawite chu, keini aia fing leh thil hre zawk, keini aia ram hmangaih zawkten an rawn sawisel hi a lawmawm em em a ni. Nimahsela, vei zawng leh thil min kaptu hi kan nei ve lo thei si lova, chutiang huna biakrawn atan an hming pum hi han ziak lang ta se a va tha dawn em.
‘Kumthara Sawrkar ngenna pathum’ tih ka ziahah khan, Group A Officer kumtin lak teuh thin hi kum thum kum li danah tih ni tawh se, tih kha ka sawi a. Mahse, kei aia fing leh ram hmangaihtu zawkten, Group A Officer kan la tlem thu leh hnawhkhah a tul thute an rawn sawi leh si a. Chumai bakah, hetiang lam thu hi mimawl leh zirchianna nei loten lo armittet khuanpui ve vak vak loh tur, tih lam hawi deuh khan an rawn sawi bawk si a. ” E.. a lo ni maw. A va zahthlak ve” ka tih rualin, ngaihdan mawl tak erawh chu ka la nei tho a ni.
Zir san viau leh zirchian vak pawh ngai lo, mi fing uchuak tak ni ve kher lo pawha kan lo hriat ve theih chu-kan ram zau zawng area leh, kan ram mihring tam lam population zat hi a ni. Chu bakah, kan Sawrkar hmalak dante, kan sawrkar hnathawkte chetvel dante, mipui nunphung leh khawsazia leh, kan ram inrelbawl dan boruak velte hi kan hmu pha ve vek tho a ni. Tin, mihring pung chak si lovin, sawrkar hnathawk pun chak thute, hna tha aia mi duham pun chakziate, hmasawnna tluantling aia eirukna tluantling pun chakziate hi kan hre thei ve tho a ni.
Sawrkar hnathawk tam lam hrim hrimah chuan mi state aiin kan ramah an tlem zawk ngei ang. Mahse, mithiam hoten in chhut danin, a mihring tam lama tehin, kan ramah sawrkar hnathawk an tam lawr laka, an hlawh tam lawr lak bawk in ti thin a ni lawmni kha? Hmasawnna hna thawhna tur let tam tak sawrkar hnathawk enkawlna leh an hlawhah a kal thin tih in sawi thinte kha tak tak niah kan lo ngai asin.
Administrative District 11 ngawt kan nei pawh hi, ‘ em ema’ kan ti tawh a, mahse, kan ram inkalpawhnate a buaithlak em avangin, a pawi love, kan ti hram a ni a. Nakinah chuan khaw 4/5 lek lek hian District nih an la phut anga, Veng 2/3 enkawl tur hian Development Block kan la siam anga, mihring sangthum vel awp turin Administrative Sub-Division-te kan la nei anga. Police lamah, Veng 3 vel vil turin SDPO te an la awm anga. Engineer lamah nise, Veng 2 tan EE enkawl turin Division kan siam anga, Vengtinah SDO an la awm anga, Khaw 3 vel huamin, SE enkawl tur Circle te kan la nei mai lo ang tih pawh sawi theih a nih tak loh hi. CE lah kan ngah tawh. E in C an ti. Lal dan indawt tur dang pawh an la ngaihtuah chhuak leh mai thei a ni. Chutiang bawkin Department dang pawh, bial zim te te leh mihring tlem te te hi Officer hautak pui pui hian an awpa, an intheisem vel mai mai ni ber hian kei thil hre zau lo hian ka lo ngai ve ngawt bawk thin a nih hi.
Kan State aia let tam taka zau leh, keini aia let tam taka mihring tam zawkte pawh hian, Chief Minister pakhat, Governor pakhat, Chief Secretary pakhat chauh nei chung hian engtinnge maw sawrkar hna an thawh bik le? Buai chuang miah lo leh, hmasawnna ropui tak tak thawk tur hian eng power leh eng magic nge maw an hman bik le? State danga Officer ni tawhte khan min han hrilhfiah teh u khai.
Kan ramah Officer kan la tam tawk lo, titute thlirna tlang hi chu-High class dinhmun atangin, Luxury seata thu chungin, High power glass tarmit vuah chungin a nih hmel.
Officer leh officer lo post hi hnawhkhah lohvin a awm love, kan ti lova, kan ram dinhmun thlirin, Sawrkar hnathawk size hi tite-in, hlawk zawk leh thahnemngai zawka hna thawh i inzirtir ang u, kan tihna a ni e.