Aizawl: Aizawl Municipal Corporation (AMC) Mayor Lalrinenga Sailo chuan Mizoram sorkarin local council leh village council inthlan a tihhma chhanah chhuanlam tling a awm lo tih a sawi.
Nimina Mizo Hnam Run-a MNF party chhung inkhawmah thusawiin AMC Mayor Lalrinenga Sailo chuan Mizoram sorkar-in LC leh VC inthlan a tihhma chhanah hian chhuanlam tling a awm lo tih sawiin, “LC leh VC te sorkar thawhpui thei lo an awm lo a, ZPM sorkar hian party dang LC leh VC-te a thawhpui thei lo a ni zawk,” a ti.
Local council-te phei chu AMC hnuai an nih thu sawiin mayor chuan, “Hmasawnna hna tur hmachhawp kan ngah a. Kum 2023-2024 fund central lam atanga lo kal tur Rs vbc 15 chuang a la awm a, 2024-2025 chhungin development fund Rs vbc 29 chuang lokal tur a la awm a. Keimahni thawhchhuah ve sum Rs vbc 13 vel a la awm bawk a ni,” tiin, hmasawnna hna thawk tur an la neih teuh laia an term pawh tawisak hi a dik lo a, anmahni thlang tlingtu mipui zah lohna a nih thu a sawi.
MNF adviser ni bawk Lalrinenga Sailo chuan, “ZPM sorkar atanga kum khat pawh tling lovah Sinlung Hills Council kan inthlang a. MNF-in sorkarna kan la a, tun LC leh VC inthlanah pawh hian beiseina sang tak kan nei a. Congress sorkar vanglaiin AMC-ah MNF kan sorkar thei a, mipuite hian party an en vak lo niin a lang,” a ti.