Uttarakhand-a 38th National Games kal mek zelah TC Lalremruati’n quarterfinal a lut a, thalkahah Services Sports Control Board-a awm, Mizora atanga aiawha tel, Vai Bhav leh Sachin Vedwan te chuan chuan round of 32 a lut bawk.
Hetih lai hian Thawhtanni tlai khan football (mipa)-ah Mizoram chuan group stage inkhel hnuhnung berah Assam chu 3-0 a hnehin semifinal an luh leh luh loh erawh he chanchin ziah lai hian a la hriat loh thung.
Pathianni khan Pithoragarh-a 57-60kg pre-quarter final-ah Remruati hian Odisha boxer Nibedita Swain chu round hnihnaa RSC (referee stops contest)-a hnehin quarterfinal a lut.
Remruati hian round hmasaah pawh a tumpui hi a hneh hle a, round hnihna an khelh laiin referee-in Swain-i khelh dan leh dinhmun enin khel zui chi nia a hriat loh avangin a titawp ta ringawt a ni.
Hetih lai hian boxing-ah tho, 54-57kg pre-quarterfinal-ah Lalruatfela a chak zo lo thung a. Uttar Pradesh boxer Manish Rathore lakah point-in a tlawm a, Fela lakah hian round tinah a chungnung zawkah tangin phu takin hnehna a chang a ni.
Dehradun-a archery (thalkah) inelnaah Indian round qualifying-ah Bhav chuan point 637 kap chhuakin 20-na dinhmun a hauh va, round of 32 a inhlankai a. Hetih lai hian he round-ah vek hian Isak Lalchuailova chuan point 625 kap chhuak mah se 35-na a ni a, round of 32 a inhlangkai zo ta lo thung.
Thalkahah hian Thawhtanni khan recurve qualifying round-ah Vedwan chuan point 658 a kap chhuak a. 20-na niin round of 32 a in hlankai bawk.
Thawhtanni tlai khan vawi hnih khelha point li hmu tawh chungin Mizoram mipa football team chuan pool match hnuhnung berah Assam an hmachhawn a. K.Lalremmuana, Peter lalrinhlua leh Lalengmawia te goal thun hmangin Assam chu si thum faiin an hneh a, an pool-ah 2-na niin semifinal lut thei dinhmun an hauh rih mek.
Hetih lai hian an hnuah an pool-ah tho Goa leh Uttarakhand an inkhel a, hemi result azir hian tlang leh tla thei an la ni a. An inhnehtawk chuan Goa-in Mizoram an lo hneh tawh avangin an tlang thei dawn a. Uttarkhand an chak erawh chuan Mizoram hi a thiam pali zingah an tel thei danw a ni.
Mizoram hian Pool A-a an khelh hmasak berah a thlengtu, Uttarakhand nen 1-1-a inhnehtawkin a vawi hnihnaah Goa chu 2-0-in an hneh a ni.