MNF Legal Board hruaitute chuan Mizoram sorkarin village council pathum a thiahna high court-in a hnawlsakte chu court thupek anga thuneihna hlan let vat turin an phut.
Nilainia Aizawl Press Club-a thu thar thehdarhtute an kawmnaah MNF Legal Board Secretary David R Lalsawmtluanga chuan ZPM kaihhruai Mizoram sorkarin mipui rorelna bulthut, VC leh LC-te chunga kutthlaka party dang VC an nih avang ngawta VC thenkhat a thiat chu high court-in a hnawlsak hian ZPM sorkarin lalna leh thuneihna an duhzia a nemnghet zel tih a sawi.
David R Lalsawmtluanga chuan Mizoram sorkarin Champhai leh Khawzawl district-ah ringawt VC panga – Ngur, Hnahlan, Thekpui, Zawlsei leh Sialhawk VC te awm tha hle hle lai chu an namthlu ringawt a. An sorkar tuk lawkah Ngur VC an thiat a, mipui court-ah ZPM sorkar duh dan takin September 24, 2024 khan bye-election hmanga fiah niin MNF party thovin VC an siam tawh tih a sawi.
Thekpui leh Hnahlan VC pawhin tihsual nei pawh ni lova itsikna leh lal duhna vang ringawta namthlukte an nih avangin high court-ah an zualko tih a sawi a. Dan kalha sorkarin a thuneihna a hman sualna a ni tih court chuan nemnghet lehin thutlukna chu January 30, 2025 khan VC thiahna thupek chu a sut nghal tih sawiin MNF Legal Board secretary chuan ‘Hnahlan leh Thekpui VC thiah dan hi leilung pianken rorelna dik, Principles of Natural Justice kalh a ni tih high court chuan a sawi’ tih a sawi a. Heng VC pathumte hian an hna pangngai an chhunzawm lehnghal theih nana hma la turin sorkar thuneitute chu hriattir nghal an nih thu a sawi bawk.
MNF Legal Board secretary chuan February 4, 2025 khan Sialhawk VC chungchang pawh high court-in thutlukna siamin, ZPM sorkarin a suspend-na chu a thiahsak leh bawk a, an hnathawh chhunzawm lehnghal tura hma la turin sorkar a hriattir tih sawiin, “Hetianga high court thupek awm reng chunga thuneihna an la hlan let duh lo hian high court an zah lo hle tih leh lalna leh thuneihna atchilh an nihzia a tilang chiang hle bawk a, rang taka court thupek anga VC-te thuneihna hlan let vat turin kan phut a ni,” a ti.
High court rorelna viak tha tak Mizoramin nei lo phei se chuan dictator sorkar hnuaia awm ang maiin Mizo mipuite hi rahbehin an awm dawn tih a chiang hle tih sawiin David R Lalsawmtluanga chuan, “Thuneihna an hman sual, court lamin a thiah chhoh tak zel avang te, an intiam anga hmunphiah leh sawhthing leh a dangte an lei theih dawn loh avang te, kawng engkimah party induhsakna nasa taka kalpui an duh avang te, an party leh an party tantu an hniam chak em avang tein Mizoram mipuiin kan duhthlanna thiang taka kan siam, VC leh LC-te hun chu kum chanve chuang laiin a pawhtawisak ta ringawt a. Mipui rorelna suasamtu sorkar hi tuilet hnuah kan la hrawn lo va, India ramah pawh a la thleng awm lo ve,” tiin VC leh LC inthlanpui neih turah mipuite duhthlanna rapbettu ZPM paih thla turin Mizo mipuite an ngen.