Brazil defender Marcelo chuan football khelh a chawlhsan ta tih a puang a, kum 36 mi a ni.
Lawmman dawng tam ber pakhat, left-back hian Brazil tan pawh vawi 58 a lo khel tawh.
Brazilian club Fluminense-a a inzir chhuah hnuah Marcelo hian kum 18 mi a nih laiin kum 2007 khan Real Madrid a zawm.
Bernabeu-a kum 15 a awm chhungin nomawi 25 a la hman a, heng zingah hian Champions League panga leh La Liga paruk pawh a tel.
“Kum 18 ka nihin Real Madrid-in kan kawngka rawn kikin ka zawm a. Tunah chuan inchhuang takin Madrileno dik tak tiin ka insawi thei ta,” tiin Marcelo hian social media-a video a dahah a sawi.
“Player ni chunga ka zinkawng chu a lo tawp ta a, football tan thil tam tak ka la pe reng a, engkimah ka lawm a ni,” a ti.
Marcelo hi kum 2021 khan club captain an nihtir hial a, kum 117 chhunga Spaniard ni lo an club captain banhren an pek hmasak ber a ni nghe nghe.
Real Madrid President Florentino Perez chuan, “Marcelo hi Real Madrid leh football khawvel-a left-back ropui ber a ni a, hun rei tak ani avanga hlimna kan chang thei hi kan ngaihlu hle a ni. Kan legend ropui zinga pakhat a ni a, Real Madrid hi a tan chuan a in a ni reng dawn a ni,” a ti.
2021-22 season tawp khan Madrid chhuahsanin Greek club Olympiacos a zawm a, thla nga hnuah a contract tihtawp a ni.
Kum hnih kal ta khan a inzirna, Fluminense chu kum 2023 khan zawm lehin vawi 68 a khelhsak leh hman.