Basketball legend Kobe Bryant-a’n kum 2013-a a kheimit tha, Achilles tendon a tihnatna inkhela a bun a pheikhawk chu $ 6,60,000 zetin lilamnaah hralh a ni.
Los Angeles Lakers-a khel Bryant hian Golden State Warriors an tum tumin a intina chung hian free throw vawi hnih a lut zui tho nghe nghe.
“Kobe-a khelh hun chhung khan ‘Mamba Mentality’ ai mahin ‘The Achilles Game’ kha a chhinchhiah tlak zawk a ni,” tiin lilamtu, Sotheby’s chuan an zawrhnaa an sawi fiahnaah an tar lang.
Basketball Hall of Famer hi January, 2020 khan kum 41 mi niin helicopter chesualah Calabasas, California-ah a thi a, hemi tum hian mi pariat thiin a fanu kum 13 mi, Gianna pawh a tel.
Sotheby’s hian Nike Kobe 8 Elite sneakers hi $6,00,000 atanga $8,00,000 inkar vela an hralh theih an inbeisei.
A thih hnuah Bryant-a kaihhnawih thil hrang hrang hi lilamnaah man to tak takin an lo hralh hlawm tawh a. A ke a tihnat tuma a hak tho jersey pawh June, 2024 khan $ maktaduai 1.2 zetin an lo hralh tawh bawk.
Kum 2023 khan a jersey pakhat, amahin a hming a ziahna, 2007 leh 2008 season-a a Most Valuable Player (MVP) a nih tuma a hak pawh $ maktaduai 5.8-in an lo hralh tawh a. Hei phei hi chu basketball jersey hralh man to ber dawttu a tling niin ESPN chuan a tar lang nghe nghe.