Uttarakhand-a 38th National Games kal mek zelah Mizoram chuan gold medal pahnih a la ta a, hengte hi taekwondo hmanga hlawh chhuah ve ve a ni a, Inrinni khan Male Team Poomsae-ah Mizo tlangvalten Services Sports Control Board (SSCB) hnehin thiam ber nihna an hauh leh a ni.
Poomsae hi round tinah poomsae hnih theuh hmanga inel a ni a. Seeded zawnna, pre-quarterfinal ni bawkah Mizoram hi Services hnuaiah awm mah se a pawimawh berah an hneh a ni.
Services hi Seeded No. 1 niin Mizoram hi No. 2 an ni thung a, knockout round (quarterfinal) an inhlangkai a. Quarterfinal-ah hian Seeded No.7 Gujarat nen intum lehin accuracy leh presentation-ah chungnung zawk ni ve ve chungin an tlang.
Semifinal-ah accuracy tha tak, Arunachal Pradesh nen intumin Mizoramn point 6.749 an hmu a, point 0.017 an tumpui aia hmu sangin final an inhlang kai.
Final-ah hian kum khat chhunga a vawi thum nan Services nen an intum leh a, tun hnaia an lo intum tawh vawi hnihah vawi khat ve ve chak zawk nihna an hauh va, seeding-ah an phak lo thung.
Seeded No. 1 ni zawk mah se Service hian hian 1st Poomsae-ah balance an tihchhiat zawk avangin Mizoram an chungnung a. 2nd Poomsae-a che tha zawk, Service hian point 6.633 hmu mah se Mizoram point 6.700 an phak zawh loh avangin Mizo tlangvalten Mizoram tana tun inelnaa gold medal pahnih an hlawh chhuak ta a ni.
Mizoram Men’s Team-ah hian Lalthlamuanpuia Venghlui; H.Vanlalfela, Armed Veng South leh Daniel Lalhumthanga, Chhinga Veng te an tel a. An pathum tangkhawp hian Mizoram tan gold panga la tawhin kum 2019-a Katmandu-a South Asian Games-ah pawh khan India aiawha khelin gold nedal an hawn tawh bawk.
Thlamuanpuia hian tun games-ah hian Mens Individual Poomsae-ah Mizoram tan gold medal a lo la tawh bawk a. Ningania final-ah National Games hnuhnung ber, Goa-a gold medal latu, Services tana khel, Dingku Singh a hneh nghe nghe a ni.
Uttarakhand-a India infiamna inkhawmpui lian kal mekah hian Mizoram hian taekwondo hmanga gold pahnih an lak tawh bakah wushu-ah bronze a lo la tawh bawk a ni.