France leh United States tlawha zin mek, Prime Minister Narendra Modi chu a zin chhuah dawn khan mi firfiakten beih an tum niin Mumbai Police chuan Nilaini khan an puang.
ANI-in a tar lan dan chuan Mumbai Police hian February 11 khan Police Control Room-ah call an dawng a, mi firfiakten prime minister hi ram pawna a zinnaah a thlawhna an bei mai thei tih an dawng a ni.
He thu an hriat rual hian police chuan a mawhphurtu venhim hna thawktute an hriattir nghal a, a zin chhuah hmain an chhui zui hman bawk niin ANI chuan a tar lang.
Police chuan he thil hi an la chhui zui reng bawk.
Modi-a hian Thawhlehni khan France a thleng a, Indian awmten an lo dawngsawng.
Indian hruaitu hian US Vice President JD Vance leh French President Emmanuel Macron te a kawm tawh a. AI Action Summit leh 14th India-France CEOs Forum-ah thu a sawi tawh bawk.
Nilaini khan prime minister hian Google CEO Sundar Pichai chu Paris-a AI Action Summit neihnaah a kawm bawk a, India-a AI luh theihna tur kawng zau tak awm chungchang an sawi dun.
Indian chhulchhuak, Alphabet Inc. CEO pawhin Google leh India thawkhova digital-a an ram her danglam theih dan an sawi dun.
Prime Minister Modi hian Nilaini vekah khan Consulate General of India chu French President Emmanuel Macron nen an hawng dun bawk.
Tun hi Modi-a’n France a tlawh vawi rukna niin Paris atang hian US a pan ang a, ni hnih a cham ang.
US-ah hian President Donald Trump a kawm ang a, hei hi Trump-a’n a vawi hnih nana an ram a hruai leh hnua an inkawmna hmasa ber tur a ni ang.