Aizawl: Lunglei district-a Lungsen Block chhunga Lalnutui Village Council vawiina inthlang tur buaipuitu, polling party chuan nimin khan an duty-na hmun tur an pan.
Mizoram district pakua-a Village Council leh Local Council inthlanpui chu nimin khan neih a ni. Mahse, Lalnutui Village Council candidate pakhat a thih avangin inthlan hun sawn hlat hret niin, inthlan hun atan vawiin hi ruat a a ni a, zing dar 7 atanga tlai dar 4 inkarah inthlan hi buatsaih tura ruahman a ni.
Lalnutui Village Council inthlan buaipuitu turte chuan nimin chawhma dar 10 khan Lunglei Bawrhsap pisa tual atangin an duty-na tur hmun an pan.
DC office-a despatch counter atangin inthlan buatsaihna tur hmanrua leh bungruate lam khawmin, an bungruate an endik fel vek hnuah an duty-na tur hmun hi an pan a. Polling party-ah hian inthlan huaihawttu tur Returning Officer (RO)-te, inthlan buaipuitu tur Presiding Officer (PRO), leh Polling Officer (PO)-te, venhimna hna thawk tur security-te leh lirthei khalhtute an tel a ni.
Lalnutui VC-ah hian seat pathum (general seat 2 leh reserved seat 1) awmin, inthlan chuhtu candidate mi 10 (general seat-ah 8 leh reserved seat-ah 2) an awm a. Indian National Congress (INC) leh Mizo National Front (MNF)-ten candidate pahnih ve ve neiin, Zoram People’s Movement (ZPM)-in candidate pathum an nei a, Independent-a ding pathum an awm bawk.
Lalnutuiah hian vote nei mi 192 (mipa 94 leh hmeichhia 98) an awm a ni.