Real Madrid forward Vinicius Jr chuan Thawhlehni zana Manchestery City nen Champions League play-off thawh khatnaa Rodri-a’n Ballon d’Or a dawn khalh avanga anmahni tantuten an lo tihelna banner chuan amahah chakna a pek sawt thu a sawi.
Spain midfielder Rodri hian nikum October khan chawimawina hlu tak hi Brazil winger a dawn khalh a. Real phei chuan an player hi a phu zawk nia an hriat avangin Paris-a a hlanna inkhawmah khan an tel duh loh phah.
Thawhlehni zana Etihad Stadium-a an inkhelhah tan hmain City tantute chuan Rodri-a’n Ballon d’Or a fawp lai leh ‘Stop crying your heart out’ tih thu inziahna lian tak lo ken khumin Vinicius hi an lo tihel a ni.
Mahse, a tawpah hnehna chang zawk erawh mikhual niin hun tawp dawna Jude Bellingham-a goal hmangin Real hi 3-2-in an chak haw.
“Banner kha ka hmu ve,” tiin Vinicius Jr hian Movistar hnenah a sawi a. “Hetianga lehlam pawl tantuten thil an lo tih hian inkhelah chakna min lo pe sauh zawk thin a, chutiang chiah chu a thleng leh a ni,” tiin a sawi.
Tun hi season li chhung a zawn leh season ruka a vawi nga nana knockout stage-a team pahnih an intumna a ni.
Nikum khan quarterfinal-ah Real hian penalty petah an hneh a, Carlo Ancelotti-a team hi a vawi 15 nan an champion zui.
“Kan history leh he inelnaa kan thlen chin zawng zawng an hre vek,” tiin Vinicius Jr chuan a sawi bawk.
“Tun hi vawi nga kan kalna a ni tawh a, kan kal apiangin a vawt em em ziah a; mahse, tun tum chu kan chak a, chak zel pawh kan tum a ni,” a ti.
Team pahnih hi thawh hnihna atan Nilainiah hian Madrid-ah an inkhel leh ang.
City hnehna goal thuntu, Bellingham hian Euro 2024 khan England tan Slovakia lakah extra time tawp dawnah thunin semifinal an lo lut tawh a, Manchester khawpuiah pawh hero a ni leh.
“Goal pui tak a ni,” tiin Real boss Ancelotti chuan Amazon Prime-ah a sawi a. “A khel tha em em a, a hlauhawm tluan zak a, a khelh that em em tum a ni,” a ti.
Bellingham-a hian tun season-ah goal 11 a thun tawh a. “Khelh tan em em chunga a tawpa chak loh kan nei thin. Tun hnaia City khelh dan lamin min tibuai lem lo va, team tha tak an ni. Khelh fimkhur an ngai a, a tawpah chanve kan nei ta hlauh a ni,” a ti.
Thawh hnihna turah, “Mahni muala hmahruai chunga kan khel tur hi a lawmawm a, Bernabeu-ah chuan kan paltlang ngei ka ring a ni,” a ti.