Nilaini zanah Liverpool chu point zetin an sang fal tur angin an lang hman a; mahse, hun tawp dawnah James Tarkowski a lo lang.
Everton defender hian Goodison Park-a Merseyside derby hnuhnung berah hun tawp dawnah goal thunin Reds nen 2-2-in an inhnehtawk.
Toffees tantute an lawm em em ruala lawm ve dang chu Arsenal an ni a, Liverpool-in point hnih an hloh avangin an inkar zau lutuk tur a zim hret.
Vawi 24 an khel ta theuh va, Arsenal hian khelh 14 la awmah point sarihin Liverpool hi an phak lo.
Liverpool chu chak zo lo mah se rinkai ber an la ni lo thei lo va, captain Virgil van Dijk chuan, “Kan tum ber chu keimahnia insawrbing a ni a, mi dang en lovin, keimahni chiah inngaihtuah a ni.
“Season tawp thlengin a pawimawh vek a, hmun thaah kan awm a, kan bei zel bawk ang,” a ti.
Liverpool hian point 42 hmuh theihna an la nei a; mahse, an hmu kim vek kher dawn tih a chiang lo.
Premier League chinah khelh 24 thlenga hmahruaitu thlauhna sang ber chu point nga a ni a. Hetiang hi vawi hnih thleng tawhin Manchester United khan kum 2003 khan kal falin kum ruk liam taah khan Manchester City an lo kal fal tawh bawk.
Hetih lai hian hmahruaituin khelh 24 a khelh hnua mi dangin an champion khalh leh sina inkar zau ber chu point kua a ni.
Manchester United chuan kum 1996 khan khatih laia hmahruaitu, Newcastle United aia point kuaa hniam chungin an um a, a tawpah Red Devils an champion zui.
Opta supercomputer chuan Liverpool hi champion theihna chance 88.3% an nei niin a ngai a, Arsenal chuan 11.6% an nei thung.
Pathumnaa awm mek, Nottingham Forest chuan point 10-in Reds an phak lo mek a, hetiang dinhmun atang chuan nomawi lak a har tawh dawna ngaiin 0.1% chiah chance an nei niin a ngai.
Chelsea chu palina niin champion lai, Manchester City-in point 16-in Liverpool an la phak lo bawk a, anni pahnih hi chuan Premier League nomawi lak theihna remchang an nei tawh lo niin Opta chuan a ngai.
Liverpool hian tun thla tawp thlengin league-ah khelh tur an ngah hle a, ni thum dan zela inkhel tur ang an ni a. An hmachhawn tur zinga tam tak hi a chung lam 10 zinga awm an ni nual bawk a, an kawng a hautak lai ber a ni dawn.