Arsenal forward Kai Havertz chu Dubai-a an training-naah a chawn tha a tihnat avangin tun season-ah a inlan tawh dawn lo.
Kum 25 mi hi a khelh theih dawn tawh loh avang hian North Londoners hi 2024-25 season chu striker pangngai tumah nei lova an hman liam a ngai dawn.
The Athletic chuan a inhliam thu hi a tar lang hmasa ber a. Havertz-a hnaih deuhte chuan Thawhlehnia an team an thlawh haw hnuah zai a ngai mai thei niin an sawi.
Arsenal chuan Havertz-a inhliam hi engmah an la puang lo va. Manager Mikel Arteta chu Inrinnia Leicester City an hmachhawn tura Zirtawpnia thuthar lakhawmtute a kawmnaah zawh fiah a nih rin a ni.
Striker Gabriel Jesus chu a khup zai a ni a, forward Bukayo Saka pawh December khan zai a ni bawk.
Gabriel Martinelli pawh kar hmasa khan Carabao Cup-a Newcastle an an hneh loh tuma intinain ‘thla khat chuang’ a chawlh a ngai dawn bawk.
Havertz hian tun season-ah vawi 34 khel tawhin an club-a goal thun tam ber a ni a, goal 15 thunin mi dang tan vawi nga a siamsak tawh.
Havertz-a a inhliam leh avang hian Arteta hian thlasik bazara a inthuam that bawk si loh avangin goal nawrtu a nei dawn ta rih lo tihna a ni a. Spanish boss hian Aston Villa atanga Ollie Watkins an la lut thei lo pawi a tih thu a sawi chhuak tawh nghe nghe a ni.