RTP Bajaj chuan nimin khan Aijal Club, Aizawlah Chetak electric scooter an tlangzarh a, a man a to loh avangin mi nawlpui ban phak a nih an beisei.
RTP sumdawnna hotunu Lalthangi’n Mizorama hralh chhuah turin a khuh hawng a, Bajaj electric scooter chhuak thar hi chi hrang pathum awmin mi pakhatin a man tlawm ber, cheng nuaikhat singkhat sanghnih zaruk sawmnga pariatin a lei nghal a, ani bakah hian hauh lawk mi pakua an awm bawk a ni.
Electric lirthei man a to tlangpui a, RTP Bajaj chuan Chetak man a to loh avangin mipui nawlpui lei theih turah an ngai a, March-ah a man to chi cheng nuaikhat singli sangnga vela zawrh chhuah theih an inbeisei a, tute tan pawh Bajaj Finance kal tlangin an showroom, Dawrpui Vengtharah cheng singkhat chauh sengin installment-a lak theih a ni tih an sawi.
Indian motorcycle company Bajaj-in Chetak scooter a hlawhtlinpui hle a, electric an tihchhuah hnuah pawh beiseina an nei sang zui a, Info Bikes hotupa Vanlalmuana chuan a pian a nalhin electric scooter dang angin ruangam danglam taka siam a ni ve lo va, thahrui a neiin a chak viau a, a brake a tha tawk bawk a, kawng hrang hrangin a khalhtute awlsamna tura thuam a ni, a ti.