- Reuben Lalnunthara Hnamte
He ta kan thupuia han sawi ka tum chu awm dan mawi hi a ni ber mai a. Awmdan mawi hi lehkhathiam leh hauhsak emaw avanga neih ngawt chi pawh alo ni lem lo. Lehkhathiam na na na chu an lo polite deuh pawh a ni maithei a, mahse, an ni vek lem lo. Hringnuna kan damchhung reiloteah hian awmdan mawi hi chuan nun a tihahdam a, mi awmdan mawi tak hi chu hmuh an nuam a, an bula awm pawh a nuam thin. Kan pi leh pute kha awmdan mawi leh tawngkam mawiah khan an phaktawkah chuan an entawntlak hle mai a. Midangte tana na tur leh hnawksak tura awm kha an hlauh ber pawl a ni thin. Khang hunlai kha chuan awmdan mawi an hriat ang ang leh tawngkam thate pawh an inzirtir uar hle thin a nih kha. Nupui pasal chung changa palai thuah te, mitthi an awm nikhuaa zualko thuahte pawh mi te tana tawrhna lo tur ang ber kha an zawng hram hram thin a ni. Ti te hian an lo sawi thin kha, “ anchhe lawh hi mahni chungah a tla thin “ tih te, “ lampui changkhatah mi an be chhe ngailo” tih te kha an thupui pakhat a ni thin.
Hringnunah hian sap hovin ‘manners’, awmdan mawi’ kan tih mai thite hi tunlai thangthar tam tak hian an hre tawh lo hle mai. Aia upa zahthiam tihte hi thangthar zingah a tlem ta em em mai a; aia upa pawh kutthlak hreh lo, tawngkam mawilo taka ankhum a, hmusit taka diriam duh mi tam tak an awm tawh. Kan pi leh pute chuan ‘ nu leh pa mawl biak hi a thianglo tluka ngaih a ni a, an hming pawh lam mai mai suh’ an lo ti thin. Tunlai thangthar zingah chuan hengte hian awmzia a nei tlem hle. Sap mimawl leh awmdan mawi hrelo hovin, ‘fuck’ tih tawngkam chhe tak an hmante hi thangthar tam tak hian an entawn emaw tih tur a ni a. Tawngkam chhe tak tak hi social mediaah pawh hian hmuh tur a awm nual mai. Kan piputen an lo sawi ang hian kan tawngkamte hi a boral mai mai lo, boruakah hian a awm renga, kan tawngkam chhia leh tha hi kan chungah alo let leh thin tih hi hriatreng a pawimawh hle. Chutih rualin tawngkam thlum leh tha tak, rilru chhe em em si te pawh an awm tho mai. Chutiang ho chu hratchian loh phei chuan mifel tak leh hawihawm taka ngaih mai pawh a awlsam.
Nu leh pate pawh hian kan fate hi eng angina nge an khawsak a, eng thil nge an tih tih hi kan enzuiin kan veng ngailo em ni ang? Tunlai kan nulate zingah social media hmanga inzuar a, mawi lo tak tak a inpost hmuh tur a tam ta hle mai. Thawhchhuah hriat mang lova sum ngah tak, incheina nei tak leh khawsa sang tak tak hmuh tur leh hriat tur an awm. Mi thenkhat sawi dan chuan Aizawl mi hausa thenkhat nawmchenna atana inphal rai, sum an hmuhna tur a nih phawt chuan pawisak nei map lo nula kan ngah ta hle an ti thin. Tam tak phei chuan khawlaia inzuar ai hian koh mai theih, call girl kan tih ang hi an tam zawk fe an ti a ni. Biblein awmdan mawi a sawi leh a thangmawi apiangte a tih hi chu sirah kan hnawl chiang khawp mai. Hmeichhia mai nilo, mipate pawh; tak takte a nih ngai chuan mi hausa nu ho thenkhat mahni pasalte kham lovin an koh theihte pawh an tam tawh an ti leh zel a nih chu! A rapthlak sawt hle mai kan ram hi chu. Changkannate pawh hi hman thiamloh chuan hringnun khawvel tichh vek theitu a ni tlat. Kan changkan hmaa kan mizo nulate zakzum taka an awmlaite kha mi tam ber tan chuan hmuh an nuam zawk a sin. Tunah chuan social mediate, khawlaiah te lan mawi an tum lutuk hian mit an tikham.
Kan tlangval ho tam tak lah an nula zo tawh a, tuai nih hi an intihmuh emaw tih mai tur a ni a, inthup tumna pawh an nei tawh lo. Mahse, insiamthat theih a ni a, naupan laia hmeichhia ho zinga awm nuam ti tak, hmeichhia ang mai nia inhria, nimahsela, insiamtha a pa taka awm ta te hi mi tam tak an awm a ni. Chutiang bawkin hmeichhia pawh inti pa tlat mai chi te, nupuite pawh nei hial an awm thin a, mahse, insiamthaa pangngai taka hmeichhia zama khawsa ta te pawh an awm bawk a ni. Nakin lawkah Sairangah Rel alo service hun tak takah phei chuan hnamdangte nen kan inchiahpiah dawn chauh a. Mizo kan nihna leh kan Kristianna hi humhim tlat hi a pawimawh dawn khawp mai. Chumi atana pawimawh ber chu thalaite bawk an ni a, tun atanga chhungkaw tin mai leh vengtin maiah hian inzirtirna tha tawk kan neih a pawimawh takzet a ni. Nu leh pa zahnate hi thalate hian an tlachham ta em em mai a; nu leh pa pawh be tha duh lo, mahni inchhunga thawhchhuah nei si lova inla thunei em em a, duh duh lam zuah zuah mai, hnathawk peih silo, nu leh pa thawhchhuah azara inla thawveng tak tak thalai an tam tawh a, zahna chang reng an hre si lo. Eitur a tui tui duh bawk si, zan mutna chang hre lova, zing thawhna chang hre silo thalai hi an va tam em!
Philipi 4:8 a “a thang mawi apiang te” a tih hi a lo pawimawh khawp mai. Hringnun hi a reilo khawp mai a, thatlai hun leh vanglai hunte hi ava reilo em! He kan damchhung hun reiloteah hian kan inchhir ngawih ngawihna tur leh kan thlah la kal zel tur te, mite’n kan chanchin an la sawi zui zel turah hian a thangmawi te hi kan zawn a tul khawp mai. Kan fate leh kan thlahte la zah ngawih ngawihna tur thil hi ti lo hram turin kan nun hi I fimkhur teh ang. Tute mah hi mi famkim (perfect) kan awm hauh lo; mahse, insiam tha thei lo kan awm hek lo. Humsual lo dai tawh, tihsual nei tawh kan lo nih pawhin insiamtha ila, kan nun inthlakthleng mite’n an hmuh phawt chuan kan hun kal tawh an sawi reng peih lo. Kan damchhung reiloteah hian mite hmuh leh chhungkua leh thiante hmuhah pawh “A thangmawi” hi zawn hram hram i tum ang u.