Antony chuan Manchester United a zawm hma khan Anfield-ah Mohamed Salah a thlak hman tep niin a sawi.
Brazilian footballer Antony hi Ajax tan a che tha thei bawk a, club hrang hrangin an ngaihven hlawm hle a. Kum 2022 nipui lai khan Chelsea, Liverpool, Manchester United leh Barcelona te chu amah ngaihventu langsar zual an ni.
Antony chuan Old Trafford lama Erik ten Hag hrawn a thlang ta a, duh a thlang fuh vak lo hle a tih theih.
Manchester United tan a che fuh thei meuh lo a, Real Betis chuan thla ruk chhung atan an hawh a, Spain ram a pan hnuah hian a che fuh zui hle a. Tun hnaiah Old Trafford lam a pan hma khan Anfield lam a pan teuh thu hi a sawi chhuak a ni.
Marca-in an kawmnaah Antony chuan kum 2022 khan Liverpool nen an indawr thu sawiin, Salah khan contract a ziak thar ta si a, Sao Paulo player hlui hi an mamawh leh ta si lo a ni.
“Liverpool kha zawm teuh tak ka ni. Kan inbe ve nual hman a, a tawpah erawh Manchester United ka zawm ta a. Salah khan contract a ziak thar mai si lo a, a aiawh tur khan min rawn bia a, contract a ziak leh ta si a, kan inrem ta lo a, Salah kha ka thlak teuh khawp mai,” tiin Antony chuan a sawi.
“Manchester United ka zawm a, hun ropui tak tak ka tawng a, duh ka thlang fuh hlein ka hria. Salah hi player tha tak mai a ni a, hun rei tak chu thil ropui tak tak a ti tawh a. Tun dinhmunah phei chuan khawvela tha ber tih theihin ka hria a, Ballon d’Or dawng thei tura rin kai ber niin ka hria,” a ti bawk.