Aizawl: Champhai leh Lungleiin Mizoram State University dah tura an dilna chu Zirtawpni chawhnu khan Higher & Technical Education Minister Dr Vanlalthlana kaihhruaina hnuaiah sawi ho niin, college neihsate hmang tangkaiin Mizoram State University chu clusters university kalphunga din tura sorkarin hma a lak thu sawi a ni.
Mizoram State University din tur chungchangah hian Non-Government Organisation Co-ordination Committee, Lunglei-in Lungleiah dah ni se tih leh, Champhai District NGO Co-ordination Committee atangin Champhaiah dah ni se tiin an dil a ni.
He hunah hian National Education Policy (NEP) 2020-in a phut angin, central university-te chu kum 2035 atangin research-intensive university a nih a tul tawh dawn a. Central university-ten degree an pek tawh dawn loh avangin state university-ten an pek a ngai tawh dawn a, chumi tur chuan Mizoramin state university a neih ngei a ngaih tawh thu an sawi.
State university nei tur hian sum tam tak sen belh a tul dawn a. Mizoram sorkarin sum dinhmun a that tawh loh avangin state university hi campus zau tak neia din chu duhthusam ni mah se, Mizoram sorkar sum dinhmun thlirin kalpui theih dawn loha ngaih a nih avangin, state thenkhatten state university an kalpui dan angin college neih sate hmang tangkaiin Mizoram State University chu clustered university kalphunga din turin Mizoram sorkarin hma a la a. NEP 2020 duh dan angin state university chu multidisciplinary-a kal a ngaih avangin college eng emaw zah chu sawi khawm (cluster) tum niin, resource neihsa inhman tawm theih chu inhman tawm tura ruahmanna siam a ni.
Mizoram State University Bill, 2025 chu Assembly Session kal lai mekah theh luh a nih thu sawi a ni bawk.
Thutkhawmah hian Lalrinpuii, Minister & MLA, Lunglei East; V. Malsawmtluanga, MLA, Lunglei North; Lalramliana, MLA, Lunglei South; Er. Ginzalala, MLA, Champhai North leh Higher & Technical Education Department hotute an tel.