Aizawl: Chef Secretary Khilli Ram Meena chuan Inrinni khan Mamit tlawhin sorkar department hrang hrang hotute a kawm.
Mamit District Bawrhsap K Laltlawmlova kaihhruaina hnuaia Mamit DC Conference Hall-a an inkawmnaah hian chief secretary chuan Mamit district chhunga hmasawnna hna kal mekte chu tha taka a kal theih nan theihtawp chhuaha ngaihtuahna seng turin sorkar hotute a chah a. Mamit district dinhmun tha zawka a ding tura an tanrual a ngaih thu leh mipuite hnen thleng phak ngeia mahni hmazawn theuha taima taka hnathawk turin kalkhawmte a chah.
He huna bawrhsapin Mamit district dinhmun hrang hrang a tar lan danin, mihring 1,01,290 an awm a, a zau zawng hi 3,025 sq.m a ni a. In 20,902 awmin literacy rate hi 84.93% a ni bawk.
Aspirational district hnuaia hmalaknaah tehfung hrang hranga tehnaah dinhmun tha tak tak a lo hauh tawh a, hemi avang hian NITI Aayog atangin Rs vbc 19 dawn a ni a, ranking hnuhnung berah hian overall performance 5th position an hauh mek a. District hmasawnna atana scheme hrang hrang hnuaia sum hmuh leh hmanna hna kal leh hmachhawp bakah project thenkhata hnathawhte a sawi fiah a ni.
Mamit SP Pukhraj Kamal pawhin district chhung dinhmun hrang hrang sawiin police sub-division pathum – Mamit, Kawrthah leh W. Phaileng awmin, police station panga leh out post pakhat a awm thu a sawi a. Venhimna hna leh dan bawhchhiate man chhuak tura tha an thawh dan hrang hrangte a tar lang bawk.