Agriculture Minister PC Vanlalruata chuan sawhthing hi hralh chak theih loh mah se, bituk bik awm lovin a hralh theih chhung chu sorkarin support price an pe dawn tih a sawi.
Nimina Assembly Session-a zawhna leh chhanna huna member-te zawhna leh zawh belhnate chhangin Agriculture Minister chuan, India ramah sawhthing production a tam em avangin Mizoramah pawh sawhthing rate a sang hlei thei lo va. Ni tinin India ram state hrang hrang rate-te chu Marketing Board chuan a thlithlai reng tih a sawi.
PC Vanlalruata chuan tunah hian India ramah a sang chho hret a, Kg-ah Rs 33/34/35 te a nih thu sawiin, “Chutiang a nih lai chuan, kuthnathawktuten sawhthing hralh an duh tawh si a. February 20 atang khan Secondary Collection Centre (SCC) 62 atangin kg-ah Rs 50-in kuthnathawktute sawhthing chu kan la phawt a ni,” a ti.
Mizoramin regulated market a la neih loh avangin thlai thar hralh chhuah a buaithlak tih sawiin agriculture minister chuan, “Tun hma chuan sawhthing hi khaw tam takah, an khaw level-ah auction an lo kalpui tawh thin a. An ti fuh em em a. Chutiang deuha SCC ruahmante hi cluster society an ti a. Khami area chhunga Primary Centre atangin hruaitu inthlangin an indin a, anni’n sawhthing leh thlai dangte pawh an lo buaipui a, an lo kal ve theihna turin ruahmanna a ni,” tiin, bul tan chauh an la ni a, an la siam tha chho zel turah an ngaih thu a sawi.
Agriculture minister chuan sawhthing hi grade-a then tumna a awm rih loh thu leh, chhungkaw khat atanga lei tur bithliah a awm lo tih a sawi a. February 20 atanga June, 2025 chhunga SCC-a sawhthing hralhtute chu support price pek tura ruahman ni mah se, March 1 khan ZPM legislature party meeting an neih chuan June thla thleng marketing board-in a ruahman tawh chu, sawhthing hralh a chak tak loh avangin ngaihtuah that leh an tih angin June, 2025 thleng support price pe tura an inruahman chu, a bituk bik awm lovin a hralh theih chhung chu support price an pe dawn niin a sawi.