Mizorama basketball inelna lian leh sang ber, Mizoram Super League (MLS) season 10-na chu Thawhlehni atang hian khelh tan a ni dawn a, kalphung thar nen inelna hi kalpui a ni dawn a, inel tur club pariatte pawhin ram dang player an nei fel vek tawh bawk.
MSL X hi Ningani zan hian Dawrpui Multipurpose Hall-ah a bul tanna, Tip-Off hun hman a ni ang.
MSL X hi kum dang ang bawkin R.Dengthuama Multipurpose Hall, Aizawlah khelh a ni dawn a, club pariat inelna tur niin Aizawl bakah Champhaiah round khat an khel ang.
Tun season-ah hian kalphung thar a awm dawn a, mipui hip zawk theihna turin MSL Board chuan ruahmanna siamin season danga ram dang leh state pawn player pakhat ve ve quarter khat khelh duntir theih thin chu tun season-ah hian quarter hnih an khel dun thei tawh dawn.
Season danga Aizawlah vek inkhelh thin chu kuminah hian Champhaiah March 17 leh 21 inkar hian an khel tel dawn bawk.
Tun season-ah hian club tel tur pariatten ram dang player an nei kim vek tawh niin Nilainia MSL Board-in Aizawl Press Club-a thuthar lakhawmtute an kawmnaah an sawi a. State pawn player pawh an nei vek turah an ngai bawk.
Kumin inelna season hmasaa sponsor-tu, Sharda University bawkin sponsor lehin Sharda University MSL X tih a ni dawn a, champion hian Rs. nuai 2.5 an dawng ang a, finalist-in Rs. nuai 1.3 an dawng dawn bawk.
MSL X-ah hian champion lai, Zarkawt BCA bakah Khatla TBL, Chanmari Basketball Club, Electric Veng Basketball Club, Champhai Basketball Club, Bungkawn LB, Zemabawk Basketball Club leh Saron Veng Basketball Club an inel dawn a ni.
MSL hi kum 2015 atanga khelh tan kha niin Khatla TBL chu champion hmasa ber an ni a. Vawi kua khelh tawhah Zarkawt BCA chu vawi nga champion tawhin nomawi la tam ber an ni a. Mission Veng Vikings chu vawi khat an champion tawh bawk.
MSL Board hotute chuan MSL buatsaih hi basketball-a Mizoten hma an sawnpui nasain an hlawkpui hle niin an sawi a. Thui tak an thlen theih phah niin an sawi.
“Hma kan sawnpui nasaah kan inngai a, tun hma lam chuan Mizo zingah pa lian deuh an lo inkhelh vein kan player-te an buai mai thin a. Tunah erawh chuan player-ten an khelhpui zel tawh avangin anmahni chauh ni lo, coach-te thleng pawhin pa lian lo ven dan, bum dan, paltlang dan thlengin an thiam phah tawh a ni,” an ti.
MSL Board hotuhe hian kumin hi ZONET TV nen an thawhhona ziah sa an hman zawh kum a ni tih an sawi bawk a. Thawkho zel turin inremna la siam lo mah se tawngka chuan an indawr tawh a, a thuphung chuan an inrem thuak tawh niin an sawi bawk.