Chief Minister Lalduhoma chuan senso a tam emaw, kumina farmer-ten sawhthing an thar zawng zawng chu an lei vek dawn niin a sawi.
Nimina Assembly Session-ah sawhthing an lei leh kalpui dan chungchang sawiin chief minister chuan, ziak leh tawngkam pawhin sawhthing hi kuthnathawktute kawtkaiah lei turin an sawi ngai lo tih a sawi a. Tu sorkar mahin an kawtkaia lei vek an tlin an rin loh avangin collection centre an siam tur thu leh hemi atang sorkarin rate angin leisak turin an ti tih sawiin, “Kan intiam loh primary centre leh secondary centre inkar phurh man chu sorkar hian a pe thei lo. Pek sen ngaihna pawh a awm lo,” a ti.
Tunah hian sawhthing hi kg-ah Rs 50-in an lei mai ni lovin sawhthing ip pakhat hi Rs 10 an tumsak zawk tih sawiin Lalduhoma chuan, “SCC leh buffer stock point inkara buaina man kha kg-ah Rs 3 kan tumsak a, SCC leh stock point inkar kal man zawng zawng kan tumsak vek a. Khaw hla deuh atanga Sairang kal nan Rs 70/80 te kan seng. Chuti khawp chuan kan sum sen hi a sang a ni,” a ti.
Sairanga Buffer Stock point chu tun dinhmunah a khat tawh a, an hralh thawl phawt loh chuan a dahna an nei tawh lo tih sawiin chief minister chuan, “Chuvangin, a tahtawlin kan lei dawn a. A chawh pawh hmanhmawh lo hram hram turin kan inchah a. Mahse, farmer-te an lo hmanhmawh a, an cho chak a. Kan inhnar thei si lo va. Tichuan, tunah kan khat a, lei zel tum mah ila, a dahna kan neih tawh si loh avangin kan inhralh thawl mek a. Dahna a ruah veleh kan la leh zel dawn a. June thla thleng tih kha pawh sei a ni a. Hmanhmawh pawh a ngai lo,” tiin, farmer-ten kumina an thar zawng zawng chu an lei vek dawn a, senso a tam emaw, a tlem emaw lam an ngaihtuah loh thu a sawi.