India chuan Thawhlehni zan khan Dubai-ah wicket lia Australia hnehin Champions Trophy final an lut.
Run 265 an umnaah Virat Kohli chuan run 84 vaw chhuakin captain Rohit Sharma leh opener dang, Shubman Gill te over riat lek chhungin chân mah se India a chhanhim.
Run um lama hming thang, Kohli-a hian awlsam takin a team hi hnehna a chanpui bik lo va, ball 45 la awma run 40 an la mamawh laiin Adam Zampa vaw chu long-on-ah a vuak chhuahsak hnuah hahdam deuh zawkin India tantute an awm thei chauh a ni.
Australia hian theihtawpin bei mah se a tawp lama Hardik Pandya-a’n a zawna six vawi hnih a vuak hnuah India dinhmun a duhawm zual zui a. Pandya hian ball 24 a hmachhawnah run 28 a thawk chhuak.
All-rounder hi India-in run ruk an la mamawh laiin thi mah se KL Rahul chuan six a vaw chhuak zui a, 2023 World Cup final-a an hneh loh lakah hian ball 11 hmang bângin hnehna an chang zui.
India hi tantu an tam hle a, a vaw hmasatuAustralia chu run 264 siamtirin over 49.3-ah an vawm hlum vek thei.
Australia hian bul tan thain over 38-naah mi pali thiin run 198 an tling tawh a; mahse, captain Steve Smith chu run 73 a siamah thiin a hnu ball ruk lekah Glenn Maxwell a thi zui leh a, an tlin tam tawk loh phah.
India hian Pathiannia final chu Dubai-ah an khel dawn a, inelna thlengtu, Pakistan-ah an khelh duh loh avangin Lahore-a khelh tura ruahman ni mah se hmun dangah an sawn a ngai ta a ni.
Final-ah hian Nilainia Lahore-a inkhel, New Zealand leh South Africa chak zawk zawk an hmachhawn ang.