P&E Minister F Rodingliana chuan sorkarin kawlpethaa intodelhna a ngaih pawimawh avangin Tuivai, Chhimtuipui, Turini leh Tlawng khuahna tur chu a thar thawh bakah ni zung atanga kawlpetha siam chhuah kawngahte pawh tan lak mek a nih thu a sawi.
Inrinni khan P&E Minister F Rodingliana chuan Ministry of DoNER hnuaia North Eastern Special Infrastructure Development Scheme (NESIDS) atanga sum hmuh Rs 10,28,57,992 hmanga Chite-a 33/11kV Sub-Station bun thar leh Sihhmui atanga Zuangtui (Luangmual paltlang) 132 kV Single Circuit Line Sub-Station a hawng.
Hawnna inkhawmah F Rodingliana chuan sorkar hmasa zawkten project an lo siam tawhte an tuai thar leh a, kawlphethaa intodelhna atan hian an zavaiin theihtawp an chhuak tak meuh tih sawiin, “Kan sum dinhmun en hian kan la pachhe hle a, sorkar hnathawk hlawh hi kan inpe hram a ni a. Project lian tham enkawl tur chuan kan budget bak hi kan ngaihtuah a ngai a, chumi tur chuan thawktute nen theihtawpin sorkar laipui kan nawr a, a hlawhtlinnate pawh kan hmu dawn niin a lang a, kan lawm hle a ni,” a ti.
Chief minister-in kawlphethaa intodelh a ngaih pawimawh avangin, mamawh leh harsatna an thlen apiang a chin fel dan tur a lo ngaihtuahsak zung zung thin tih sawiin P&E minister chuan, “A hun taka bill an pek avangin Rs vbc 2 dawn kan dawng lei thei a. Grading atang pawhin sum thahnem tak kan dawng bawk,” tiin, heng zawng zawng chu an zaiva thawh chhuah a nih thu a sawi.
Chite-a Sub-Sattion bun thar hawnna hi P&E Secretary K Lalrinzuali’n a kaihruai a. P&E E-in-C Er Lalnithanga chuan 132kV (Sihmui atanga Zuangtui) line thar hian Mizoram 132kV Sub-Station lian pathum – Zuangtui, Luangmual leh Sihhmui te a thlun zawm vek avangin heng sub-station-te hian line chhiat leh maintenance avanga shutdown lak a tul chang pawhin power lak luhna line dang an neih tak vek avang hian power supply khaihlak lovin an neih tluan theih phah dawn niin a sawi.