Assembly Budget Session neih meka nimina Chief Minister Lalduhoma’n house chhunga thubuai nei anga a puhna chungchangah Lawngtlai West bialtu MLA C. Ngunlianchunga chuan thubuai a neih thu hi chief minister-in a sawi hnuah a hre ve chauh tih sawiin anticipatory bail lak a tum loh thu a sawi.
Nimin khan Aizawl Press Club-ah thu thar thehdarhtute kawmin Lawngtlai West bialtu MLA chuan, house chhungah thubuai nei anga chief minister-in a sawi hnuah chauh thubuai a nei tih a inhriat thu a sawi a. ACB a zawh hnuah LADC CEM a nih laia Lawngtlai by-pass road kawng siamna tur tihchingpen chungchang a nih a hriat thu a sawi.
C. Ngunlianchunga chuan LADC CEM a nih lai, kum 2013 khan khan Lawngtlai By-pass road, Thingkah atanga kawng siamna tur, Non Lapsable Central Pool of Resources (NLCPR) atanga Rs vbc 11 vel sanction hmuin hmalakna pawh thui tak an kalpui tih a sawi a. A CEM lai kawngpui siamna tur 1st installment pawh Rs nuai 470 vel an dawng a. Mahse, January, 2014 khan minister a nih tak avangin CEM atangin a bâng tih a sawi.
CEM a nihna a kalsan hnuah V Zirsanga chu CEM a ni chho ta tih sawiin, “CEM atanga ka bân hnuah ka hnua miten an khawih zui a. Kei chuan sum leh pai chungchanga engmah hriatpui ka nei tawh lo va. Tuna thubuaiah hian ka fihlim a ni,” C. Ngunlianchunga chuan a ti.
Lawngtlai West bialtu MLA chuan CEM a nih lai khan Lawngtlai by-pass road kawng siamna tur atana hnathawktu tur chu LADC official-ten ram neitute chu September 16, 2013 khan an ziahpui tih sawiin, “Zangnadawmna ang chi inpek theih a ni lo va. Ram neitute chu tlawmngaih chhuaha ram tan tia Rs 20,000 theuh pek kan ti a,” tiin, council atanga sum pek dan zawn an rilruk thu a sawi.
C Ngunlianchunga chuan thubuai nei anga an puhna chungchangah hian ACB pawhin thu zawhfiah ve thin an tum thu sawiin, CEM atanga a bân tak daih avangin engmah a hriatpui loh thu leh, cheng khat pawh a hriatpui loh thua a lo chhan thin thu a sawi a. CEM a nih laia ram neitute nena inremna an lo siampui avanga thubuai nei a nih a rin thu a sawi.
C Ngunlianchunga chuan a chungchangah prosecution sanction pek a tul a nih pawhin chief minister chuan lo pe mai se tih sawiin, “He thubuai hi sorkar hmasaah CBI pek tum a ni a, an pe leh ta lo a. CBI kha lo kal pawh ni se, hlauhthawn tur ka nei lo. Sum thianghlim lo cheng khat pawh ka la lo. Ram tan a nih chuan a tul chuan ka tang mai ang, a tul a nih chuan ram tan thih pawh ka thi mai ang. Chu chu ram hruaitu ka nih ve chhan pawh a ni. Anticipatory hi ka la dawn lo,” a ti.