- Lalmuanzuala
- Thu hma
Mizopa kutchhuak lehkhabu zinga ka chhiar chak ber ‘Science leh Kristianna : A indo em?’ tih chu ka chhiar a, ka chhiar nawn leh thin a. Vawi thum ka chhiar chhuah hnuah engemaw sawi ve tul nia hriatna rauvin min man a, kan heti ta anih hi!
- Lehkhabu kalhmang
Khawvel hian Modern Science hi a dah sang a, hei hi thil awm dan a ni tia Science in a sawi tawh chu khawi hmunah pawh a dik leh dik loh enfiah ve pawha result ngai reng hlir chhuak thin anih miau avangin, tehna dik lo thei lo a ngaitu tam tak an lo chhuak a. Kristian sakhaw lehkhabu Bible te chu hmanlai thawnthu phuahchawp lutuk tangkaina nei lo ang hiala ngai tam tak an lo chhuak ta a ni. Tunlai tawngkam takin mi tam tak rilruah Science hian Kristianna a dah nil a ni.
Dr. Krista Roluahpuia hian he lehkhabu hmang hian History of Science leh Philosophy of Science nihna dik tak a rawn chhui chhuak a, Science hi amaha rawn intan mai a nih loh dan te, engkim siamtu Pathian, finna tawp lo neitu thilsiam te hian kalphung mumal tak a nei a, a thilsiam atang hian Pathian rilru a hriat theih anga, zirchian theih a ni ang tih rinna atanga Science hi lo chhuak anih dan ngaihnawm takin a rawn pho lang a. Science hi Kohhran thlazar hnuaia rawn piang a ni a, Judeo-Christian Worldview lei thaa rawn piang anih dan rintlak tak historical facts a rawn dah chat chat a ni.
Aristotelian Science atanga Neo-Platonic Science leh Mechanistic Science lama Science zirna rawn kalchhoh dan te, a tira Science chhunga Pathian dah pawimawh thin, Science thiamna lo sang zel avanga Pathian chu pawn lama dah a nih chhoh dan chiang takin a rawn tarlang a. Thiamna a sang tulh tulh a, atir lam leh hma lama chiang leh fiah em em te kha an chiang leh ta lo! Quantum mechanics khawvelah Science thiamna an lo hman thin, thil an lo hriatthiam tawh dan te a hman tlak ta mang tlat lo mai. Scientific Determinism pawm tlattu te’n Sakhuana lam reng reng chu thil tak tak tling lo, suangtuahna khawvel huanga an lo dah tawh ni mah se Quantum physics hian an hnawl tawh chu hnawl ngawt thei an ni lo tih a rawn tarlang leh mek a. Science leh Kristianna chu a inhne hnai chho leh mek a, Science chuan hmanlai thawnthu ang leka ngaiin Kristianna pawh sirah a hnawl a rem ta lo a ni tiin a lehkhabu hi a rawn tlip a ni ber mai.
- Mathematics, dik lo thei lo a ni em?
Mizo nawlpuiin kan subject thiam loh, kan inhlauh hmuh Mathematics hi Science innghahna lungphum pawimawh lutuk mai a ni a. Mi pangngaiin kan pawm dan chuan Mathematics chu dik lo thei lo a ni, he lehkhabu ziaktu hian hei tak mai hi a rawn bitum chat mai! Mathematics khawvelah hian a tir lamah chuan mathematical law kha Pathianin lei leh van a siam dan hriatthiam nan an hmang a, mathematics hmanga an thil hmuhchhuah kha thil nihna dik tak (absolute truth) angin an pawm a ni.
Hun a lo kal zel a mathematics chu thil nihna hriatfiahna leh, tin a hrilhfiahna mai ni lovin, a thlen tirtuah hial an pawm a, Pathian an hnawl phah leh ta. A tira a innghahna Pathian berin hmun a chan tak loh avangin innghahna dang zawn a ngai a, thil nihna dik sa, finfiah pawh ngai lo (axiom) nia an hriat chu Mathematics innghahna a lo ni chho a. Chu Axiom meuh pawh chu chik zawka an han zir chuan a dik ngei ani tih finfiah theih miah lo te a lo awm! Math chawh dik nan a tul avangin an la hmang zel a, kum 1820 a lo thlen meuh chuan dik hlel lai siam fel tumin theory chi hrang hrang rawn chhuak mahse an la hlawhtling ta chuang lo a ni! Pathian hnawl anih hian engmah hi a lo famkim zo tak tak lo a ni tih he lehkhabu hian a tarlang chiang kher asin!
- Theory of Relativity
Albert Einstein-a theory of relativity hi a hming tal hre lo chu kan tlem viau ang, chutih rualin hrethiam zik tluak erawh chu kan tlem hle ang. He theory har leh chingchivet lutuk mai hi Dr. Krista hian mi nawlpui hriatthiam theih turin a rawn sawifiah thiam tlat mai! Tunhma zawnga scientist te thil hriatthiam dan leh tunlai mi tam berin nia kan hriat ang hi thil nih dan a lo ni lo tih he theory hmang hian a rawn tarlang a. Science hmasa chuan time (hun) leh space (hmun) a thlirtu a zirin a danglam thei lo niin a ngai a. Einstein erawh chuan time leh space hi a thlirtu a zir (relative) in a danglam thei tih a rawn hmu chhuak tlat mai.
He Einstein-a theory hian physical law te hi danglam lovin a pangngai rengin a awm a ni tih a rawn tarlang a, Pathian thil siam ropui zia a rawn hailang a ni. Stephen Hawking-a ‘Theory of Everything’ lecture series ngaithla tawh emaw chhiar tawh emaw chuan Einstein-a theory atanga Big Bang theory lo chhuak hian Universe hi awm tan hun nei a ni tih mathematics takin a rawn chhut chhuak thei a, chuti anih chuan Universe hian bul tantu a nei tihnaa pawm a ngaih thu a ziak a, mahse Quantum mechanics lama uncertainty principle a bilh tel loh avangin hei hi pawm tlak a ni lo ang tiin thu a keuh tlu a nih kha.
- Quantum Mechanics
A chunga kan sawi Stephen Hawking sawi nawi lai khi Dr. Krista hian a rawn sawi pum ve thung! Mit lawnga hmuh tham loh sub atomic level-ah Science thiamnain dik leh famkim nia a lo hriat thin a hman tlak tak loh dan ngaihnawm taka rawn ziakin Modern Science hmanraw pawimawh ber mai thil nih dan teh dik theihna, tehtu a zira danglam ve ngai lo (empirical evidence) kha a hman theih ta mang lova, chu chuan Science in a lo hnawl tawh, Science khawvela hmun chang ve tawh lo tura an hnawl tawh Kristianna chuan pawimawhna thuk tak a rawn neih chhoh leh mek thu sawi nan a rawn hmang ta thung a ni.
- Tlipna
He lehkhabu hi phur thut thuziak a ni lo, zirchianna mumal tak neia ziak a ni a, a footnote leh bibliography han en ringawt pawhin lehkhabu rintlak a ni tih a chiang. Science thiamna ropui tak nei Mizopa kan nei hi a chhuanawm tawh nak laiin, Philosophy of Science lam a han tui chho leh hi Mizo Kristiante tan malsawmna ropui tak a ni. ‘Scientist ten an ti’ tih tawh chuan ‘Bible-in a ti’ tih aia ring zawk mah tawh kan tam a, mahse kan rin hi a lo rintlak a ni tih a rawn pho chhuak chiang hle mai! Apologetics lehkhabu ang a ni lo nain Apologist te tan hlei hlei pawh a tangkaiin a rinawm.
A ziaktu hian Kantian philosophy pawh a tuipui niin ka hmu a, ka mi ngaihsan Immanuel Kant hi khawvelin philosopher angin hre mah se scientist pawh a ni ve tho tlat! Solar System lo awm tan danah Solar Nebula hypothesis a vawrh chhuak a ‘Universal Natural History and Theory of Heavens’ chu 1755 khan a lo tichhuak daih tawh. Dr. Krista Roluahpuia pawh scientist tia hriat ni mahse philosopher angin kan hre chho dawn chauh niin ka hria. Mizo Kant ti mai ang aw!