US Secret Service chuan Pathianni tuk hma takah khan White House kawtah ‘ralthuam keng hmachhawnin’ an kap niin service hian thu an chhuah.
A hmain tual chhung police hnen atangin ‘thihchilhna thlen theiin Indiana atangin Washington DC a pan’ tih thu an lo dawng lawk tawh tih an sawi bawk.
Officer-te hian an mi rinhlelh hi a nihna an sawi fiahnaah ‘ralthuam nena inthuam’ tia an sawi leh an kah hi a inmil niin an sawi a. Damdawi inah awm mekin a dinhmun ‘la hriat loh’ a nih thu an sawi bawk.
President Donald Trump chu he thil thlen lai hian White House-ah awm lovin chawlhkar tawp chu Florida-a a chenna, Mar-a-Lago-ah a hmang mek niin a sawi.
“Officer-te hian an hma va hnaih a, amah hi ralthuam lo lekin intin a ni a, kan miten an kap ta a ni,” tiin an sawi.
He thil thleng hi Washington-a Metropolitan Police chuan an chhui zui mek a, anni hi District of Columbia-a dan kengkawhtute laka silai chelek apiang chhuitu an ni.