Congo chhimthlang lam, Kwa River-a lawngleng chesualah mi 25 vel an thi a. A tam ber hi football player an ni tih thuneituten Thawhtanni khan an sawi.
Footballer-te hi Pathiannia Mushie khawpia an inkhel zo haw leh lam an ni tih province thupuangtu, Alexis Mputu chuan a sawi.
Mushie territory thuneitu, Renacle Kwatiba chuan mi 30 vel dam chhuak an awm bawk niin a sawi bawk.
Mputu-a chuan zan thima khaw hmuh theih chin tawi lutuk chu an chetsual chhan pakhat ni thei a nih thu a sawi a. Player leh passenger dang phur hi luiah hian zan thim hnuaiah an chesual niin a sawi.
African ram lailiah hian lawngleng chesual hi a thleng fo va, zana veivah an chin avang leh chuang thei aia tam an chuan thin vang a ni fo va. Thuneitute chuan lawnga zin hi a himna ngaihtuah mah se a hi tam tak thei lo.
Congo-a lui liante hi mi maktaduai 100 chuangin zin veivah nan an hmang a, a bikin hmun kilkhawr, inkalpawhna dang that lohna hmunah hman a hlawh zual a ni.
Tun hnaiah mi za tel lawngleng chesualah an thi tawh a, kawng an neih tlem bawk avang leh lawngte hi thinga siam, enkawl that loh tak an nih bawk avangin tawhsual an tawk awlsam a ni.
Djibouti leh Yemen-ah pawh pem tum phurtu lawng pali chesualin mi pakhat a thi a, mi 180 chuang chin hriat lohvin an awm mek niin International Organization for Migration chuan Zirtawpni khan a sawi.
Chetsualna hi Ningania thleng kha niin an chetsualna kawng hi Ethiopian-ten tun hnaian zawh nasa a, an ram buaina chhuahsana Gulf rama luh tum an tam hle.
Lawngleng pahnih, pakhat zawka mi 30 chuang leh pakhata 150 vel chuang chu Yemen tuipui kamah an bo niin IOM country chief of mission Abdusattor Esoev chuan a sawi.
“Mi 186 vel chu tuipuiah hian an pil bo mek niin kan hriat a ni,” tiin AFP hnenah a sawi.