Zote Entertainment leh Shopee-Carmella-te film siam ‘Darchhingpuii’ tih chu March 14, 2025 (Zirtawpni) zan hian Vanapa Hall-ah tlangzarh a ni dawn ta.
‘Darchhingpuii’ film hi Myanmar atanga rawn raltlanin Mizo chhungkua an luhchilh a, an rawk dan leh pawi an khawihna thawnthu a ni a. Film siamtute chuan mimal, hnam leh ram ang zawnga inbeihna leh intihmualpho tumna lam a awm loh thu an sawi. Thawnthu sensitive tak niin an sawi bawk.
He film siam nan hian thla li chhung hun hman a ni a, lemchan lama mikhual lo tak tak RC Khiangte, Aron Hrangchal, Duhawma, Francis, LN Kawlni leh Eli Siakeng te chu a changtu langsar niin, R. Chhuangi leh Francis Malsawma te chu guest artiste an ni.
He film hi Mizo Actress duhawm Ruthy Chenkual chuan a tlangzarh dawn a, Zote Entertainment ten an chhungkaw mi leh sa an film an tlangzarhtir tumkhatna tur a ni bawk.
Tun lai kan ram dinhmun thlirin he film hi sawizui leh ngaihven zui hlawh viau tura ngaih a ni a, a belchiang duh tan March 14 zanah Vanapa Hall-a kaltawp a fuh ang.