Aam Aadmi Party (AAP) hruaitu hlun, Atishi chuan Thawhtanni khan kum 2027-a Goa leh Gujarat-a inthlan lo awm turah Congress thawhpui lovin anmahniin an ding dawn tih a sawi.
Delhi chief minister hlui hian vaukam hrul state tlawhin Margao-a an party pisa a hawng.
Thuthar lakhawmtute a kawmnaah Atishi-i chuan, “Keimahnia Goa leh Gujarat inthlan chuh turin kan inpeih tawh a. Tumah thawhpui turin kan dawr lo,” a ti.
Goa-a kum 2022 inthlanah khan mipuiin BJP an thlang tling a, Congress-in bial 11 la ve mah se an zinga pariat chuan saffron party an zawm zui tih a sawi.
Congress hi eptu party lian ber la niin MLA pathum an la nei a, AAP-in pahnih an nei.
Atishi-i chuan, “Kum 2022-a AAP candidate pahnih an tlin khan kan party-ah thla hnih pawh an awm zui loh tur thu kha titi a ni a; mahse, tun thlengin kan hnenah an la awm a, politics atanga sum siam an tum ve tlat lo a ni,” a ti.
Delhi assembly inthlana an chak loh chungchang zawhnaah Atishi-i chuan thil lo thleng tur chu AAP chungah ni lovin Delhi mipuiteah en tur a nih thu a sawi.
“BJP hian Mohalla clinic 250 an khar tur thu an puang tawh a. Damdawi a thlawna lak pawh tihtawp an tum bawk,” a ti.
An party hruaitu, Arvind Kejriwal-a’n AAP an chak loh chuan power a chhia ang a, zirna pawh chhiain sorkar sikulte a chhe leh dawn tih a sawi chu a thleng nghal mek tih a sawi.
Atishi-i hian BJP-in thla tina Delhi-a hmeichhiete Rs 2,500 pek a tiam pawh a ti lo nghal niin a sawi bawk.
“Prime minister-in March 8-a Women’s Day-ah hmeichhiaten instalment hmasa ber an bank account-ah an dawng dawn tih a sawi a. Tunah chuan chu chu theihnghilh a ni leh tawh a, scheme atana inziah luh pawh tan a la ni lo,” a ti.
“He thil ringawt pawh hian BJP hi an thil tiam ti tak tak turin inpekna an nei lo tih a tilang chiang a ni,” a ti.