Ram ralmuanga awm kan ni a, democracy ram lian bera cheng kan ni bawk. Kan ralmuanna hi khawvel awh a ni a, muang leia kan awm theihnate hi hlu tak a ni asin.
Hetiang kan nih avangin keini state thleng pawhin kan chhawr a, pawl leh eptu lam a ni emaw sorkar laka lungawi lohna leh duhkhawp lohna kan neih changin lungawi lohna kan lantir mai a, inrem takin kan kiang leh mai thin.
Chutihrual erawh chuan hetiang a lo thlen chang hian venhimna lam hnathawk turin police te dah an ni thin a, mipui lam lo hmachhawn turin ruahmanna an lo siam thin bawk.
Mahse, hetiang kan tawngin, kan tawn fo tawh chung hian innawrna engemaw deuh a awm chang hian venhimna hnathawktu lam zawkte hi a pawr pawr leh hmatawng mawl fe fe an awm leh thin hi chu insiamthat kan ngai khawpin a lang.
Mipuite zaizap a, a awm leh mawi chin hre tawh tura ngaihte hian an mi nawrte kutthlak leh tharum thawh ve chak awm ziazanga hmanrua an lek duh ta fo thin hi insiamrem a ngai ta khawp mai.
Tha taka tin thei tur leh inrem taka inthathen thei tur a huai bak zawnga chet kan ching ta fo hi hotu lamte pawhin an naute hi hrilhin, zilh thei se a tha awm e. Chutih a nih loh chuan police te mimala beihna a awm zui mai ang tih a hlauhawm thin hle.