Aizawl: Agriculture Minister PC Vanlalruata chuan, tunah hian hmunphiah grading pe lovin kg-ah 80-in sorkarin a lei mek a; grading tha tak neih theih a nih chuan Mizoram hmunphiah quality a tha tawk tih sawiin, farmer-ten inzir an mamawh hle thu a sawi.
Nimina Assembly rorel inkhawma zawhna leh chhanna hunah he thu hi sawiin PC Vanlalruata chuan, hmunphiah hi sorkarin grade A chu Rs 100 leh grade B chu Rs 80 an tihchhan chu, uluk tak leh ngun taka market an survey hnuah hei aia to zawka an hralh thei ang tih ngaihtuahna atanga lo chhuak a nih thu a sawi.
PC Vanlalruata chuan farmer-te hian an hmunphiah tharte chu grade-in thliar thei se an duh tih a sawi a. Mizoram hmunphiah hi India rama hmunphiah tha ber a nih avangin an duh hle tih a sawi a. Grading tha tak an neih theih chuan hmunphiah quality a tha tawk a, buyer te lakah pawh an induh thei ang a, an hawi ve larh larh thei dawn tih a sawi a. Chuti khawpa hmunphiah quality tha an neih chu develop an tum thu a sawi a. Tuna an kalphungah hi chuan an la hlawhchham deuh hlek tih a sawi.
Agriculture minister chuan tun dinhmunah hmunphiah grade a inang lo va, a inan tak loh avangin buaina tlem an nei tih a sawi a. Tunah hian hmunphiah chu March thla chhung hian, January leh February thlaa keh zawng zawng hi grading pe lovin, kg-ah 60-in ZOHANCO Corporation kaltlang an lei mek thu house a hrilh.
Hmunphiah Collection Centre hi tunah hian hmun pasarih – Tlabung, Phairuang kai, Marpara, West Phaileng, Saipum, Vairengte leh Sakawrdaiah a awm tih sawiin, kg-ah 80-in an buk mek tih a sawi a. “Kan farmer-ten nghah hret an thei lo va. Farmer-te hian kg-ah 80-a kan lei takah an ui a, an chalte pawh an beng ve. Kan farmer-te hi an dinhmun a chhiat avangin kan khawngaih a, kumin atangin ruahmanna fel tak kan siam ang a, training pek pawh kan tum. Chu chu kan kalpui dan tur a ni,” a ti.