Aizawl: Agriculture Minister PC Vanlalruata chuan sorkar policy-ah chuan kuthnathawktute sawhthing lei tak tak a tum loh thu sawiin, sorkar chuan support price-a luhpui an tum tih a sawi.
Nilainia Assembly session neiha zawhna leh chhanna hunah zawhbelhna chhangin Agriculture Minister chuan, sorkar policy-ah chuan kuthnathawktute tharchhuah sawhthing hi lei tak tak an tum lo tih a sawi a. Sorkarin support price-ah luhpui an tum avangin chuti lutuka inrawlh lo vin, support price-ah chiah inrawlh ang an ti a. Amaherawhchu, kuminah India ramah sawhthing rate a hniam tak em avangin loh theih lohin inrawlh a ngai tih a sawi a. Tunah hian sawhthing hi sorkarin Rs 50-in a lei a, support price a pe nghal a, a man a pe nghal tihna a nih thu a sawi.
PC Vanlalruata chuan tun dinhmunah sawhthing hi Buffer Stock Point leh Secondary Collection Centre (SCC)-a an sawhthing lei khawlte chu tihral tumin an zuar kual mek a. An hralh chhuahna lamah erawh a zat a inang lo a, support price an tum ang tia an intiam ang ngeiin auction thenkhatah Rs 30 tea an chhan chu, sorkarin support price Rs 20 a pek thu sawiin, “A rate a inrual kher a ngai lo. Chutiang chuan kan kalpui mek,” a ti.