Manchester United captain Bruno Fernandes chuan club neitu pakhat, Jim Ratcliffe thil sawi a chhang let a, a khelhpuite a chhan.
Ratcliffe chuan Fernandes chu a fak viau a, chutih rualin Manchester United player thenkhat chu an thiamna phu loa hlawh sang uchuak niin a sawi a. Player thenkhat chu an tha tawk lo tiin chanchinbumi hmaah a sawi bawk a. Casemiro, Rasmus Hojlund leh Andre Onana te chu a sawi chhan ber an nih an ring hle.
Fernandes chuan a thiante hi a chhan hle a, “He club-ah hian awm hahdam hman kan ni lo a. Club lian leh ropui tak a ni a, hei vang hian player-te chu inthlahdah thei kan ni lo. Tute pawhin min ngaihven nasa a, hei vang hian chanchin duhawm tak nei thei zel tura tan kan lak reng a ngai,” a ti.
“Sawiselna thawm hriat hi a nuam hauh lo a, player tute pawhin sawiselna thawm hi an hre fo duh lo a. Tha tawk lo intih te, hlawh sang uchuak intih te hi thil hriat nuam a ni ngai lo,” a ti bawk.
“Player-te chuan contract kan nei hrang theuh a, chutianga contract nei thei chin chu club tan an tangkai vek a ni,” tiin captain chuan a sawi.
Ruben Amorim leh a pawlte chu Premier League lamah an dinhmun a tha lem lo hle a, 13-na an ni mek a. Pathianni zan khan tlak hlauhawm, Leicester City mualah an lut a, result hriat hman a ni lo va. FA Cup leh Carabao Cup-ah an tla fel tawh a, beisei theih an la neih ber chu Europa League a ni.
Fernandes chuan nikum nipui lai khan Old Trafford chhuahsan theihna hun remchang a neih thu sawiin, captain a nih laia trophy lak theih a duh avangin hmun dang a pan loh thu a sawi chhuak.
“Hmun danga kal tura sawmna ka dawng a, club thuneitute nen pawh kan sawiho a. Ka laka beisei an neihte an sawi a, kei chuan an ruahmannaa ka la tel zel leh tel zel loh ka zawt a. Club din thar lehnaa min dah pawimawhzia ka hriatin kan hlawhtlin chhoh ka ring tlat a, hmun dang pan ka tum ta lo a ni,” a ti.