Finance Minister Nirmala Sitharaman chuan Manipur-in eibara hma a sawn theih nan sum pek tur ang chu pek vek an ni dawn tih a sawi a, thil thleng neuh neuh la awm thin mah se dan leh thupek kenkawh pawh a pum puia lakin hma a sawn tih a sawi.
Minister hian Thawhlehnia Lok Sabha inkhawma Supplementary Demands for Grant (SDG) Second Batch 2024-25, Demands for Excess Grants for 2021-22, Manipur Budget 2025-26 leh SDG (Manipur) 2024-25 a pharha zawh belhnaah a sawi a ni.
Sitharaman-i hian Thawhtanni khan Manipur budget 2025-26 pharhin sum hman tur Rs vaibelchhe 35,103.90 ruahman a ni a, tuna tangka kum kal mekah Rs veibelchhe 32,656.81 niin a pung.
Danpui Article 356 tlawhchhana February 13, 2025-a puan a nih tawh angin Manipur legislature assembly chu parliament thu emaw, a kaihhruaina hnuaiah emaw chauh hna a thawk thei rih.
“…sorkar laipui leh state sorkar hmalakna leh thawhna azarah tunah chuan buaina tenau deuh la awm thin mah se a pum puia lakin Manipur-ah hian dan leh thupek kenkawh a ziaawm tawh hle a ni,” a ti.
House-ah hian Sitharaman-i chuan ralthuam leh silai rukte chu hmuh let an ni hlawm tih a sawi bawk.
Finance minister hian Manipur-in eibara hma a sawn theihna tura suma puihna tur ang chi chu a rang thei ang bera pek vek an ni dawn tih a sawi bawk.